mohabbat

vo phuul hai kaise maan luuñ maiñ

ki phuul kā rañg hai ramīda

ġhalat hai us ko bahār kahnā

bahār to hai ḳhizāñ-gazīda

vo kahkashāñ hai maiñ kaise kah duuñ

ki kahkashāñ to rahīn-e-shab hai

maiñ mutma.in chāñd se nahīñ huuñ

ki chāñd ko bhī davām kab hai

hai roz-e-raushan bhī tīra-qismat

ye raaz vaqt-e-ġhurūb jaanā

maiñ kaise sūraj samajh luuñ us ko

nasīb sūraj kā Duub jaanā

sabā se us ko misāl de duuñ

to ye jasārat-e-javāz chāhe

sabā to kaliyoñ ko zindagī de

chaman ke kāñToñ ko bhuul jaa.e

vo yuuñ nahīñ naġhma hasīñ bhī

ki naġhma naġhma-navāz tak hai

vo saaz hogā to kaise hogā

ki saaz tarkīb-e-sāz tak hai

jo raunaq-e-bazm pur-kashish thī

vo sub.h hote dhuāñ dhuāñ hai

yaqīñ hai vo sham.a bhī nahīñ hai

ki sham.a ik shab kī dāstāñ hai

agar kahūñ hai vo sabz patta

to dhyān meñ ḳhushk Daal aa.e

daraḳht kahnā fuzūl hogā

rutoñ kā mujh ko ḳhayāl aa.e

kahūñ use hai vo arsh-qudsī

to baat phir bhī bajā nahīñ hai

zamīn vāloñ kī dastaras meñ

farāz-e-arsh-e-ulā nahīñ hai

kahāñ ye qatra misāl-e-dariyā

kahāñ mirī manzil-e-talab hai

use samundar qarār detā

magar samundar to pur-ġhazab hai

use maiñ bādal kā naam detā

magar ye bādal hai kaisā bādal

tamām sahrā taras rahā hai

magar kahīñ aur barsā bādal

maiñ is ko Thahrā.ūñ rāz-e-pinhāñ

to zehn kī hai ye nā-rasā.ī

hazār fikr-o-nazar ne chāhā

samajh meñ phir bhī na baat aa.ī

agar kahūñ maiñ vo aadmī hai

to kam-nigāhī ke zaḳhm khā.ūñ

farishte aadam pe mo'tariz the

use farishta bhī kah na paañv

kahūñ maiñ insāñ bilā-tāmmul

magar hai insān kā to saaya

dayār-e-sidra kī manziloñ se

na koī insāñ guzar ke aayā

vo sāz-e-kirdār bhī haiñ kamtar

hai zikr jin kā kahāniyoñ meñ

kañval se us kī misāl kaisī

kañval tū khiltā hai pāniyoñ meñ

kitāb kah kar samajhnā chāhūñ

to aql ye baat bhī na maane

hikāyatoñ se dalīl lā.ūñ

to sochūñ qisse maiñ sab purāne

agar kahūñ hai vo lauh-o-kursī

to baat phir bhī nahīñ hai jachtī

maiñ jis se us ko misāl detā

koī to aisī misāl bachtī

kabhī kabhī yuuñ bhī sochtā huuñ

ḳhudā nahīñ par ḳhudā.ī us kī

kabhī kabhī yuuñ bhī sochtā huuñ

ye had nahīñ intihā.ī us kī

na us kā ham-sar na us kā saaya

vo nuur vaalā vo taaj vaalā

hai nabz-e-daurāñ pe haath us kā

vo kal kā mālik vo aaj vaalā

vo kaun hai us kī intihā kyā

ḳhudā hī samjhe ḳhudā hī jaane

ġharīb-o-ḳhasta magar usī ko

davā bhī samjhe duā hī jaane

murād jis kī hai jo bhī apnī

huzūr rabb-e-jalīl māñge

'sa.īd' lekin usī ko chāhūñ

jise duā-e-ḳhalīl māñge

wo phul hai kaise man lun main

ki phul ka rang hai ramida

ghalat hai us ko bahaar kahna

bahaar to hai KHizan-gazida

wo kahkashan hai main kaise kah dun

ki kahkashan to rahin-e-shab hai

main mutmain chand se nahin hun

ki chand ko bhi dawam kab hai

hai roz-e-raushan bhi tira-qismat

ye raaz waqt-e-ghurub jaana

main kaise suraj samajh lun us ko

nasib suraj ka Dub jaana

saba se us ko misal de dun

to ye jasarat-e-jawaz chahe

saba to kaliyon ko zindagi de

chaman ke kanTon ko bhul jae

wo yun nahin naghma hasin bhi

ki naghma naghma-nawaz tak hai

wo saz hoga to kaise hoga

ki saz tarkib-e-saz tak hai

jo raunaq-e-bazm pur-kashish thi

wo subh hote dhuan dhuan hai

yaqin hai wo shama bhi nahin hai

ki shama ek shab ki dastan hai

agar kahun hai wo sabz patta

to dhyan mein KHushk Dal aae

daraKHt kahna fuzul hoga

ruton ka mujh ko KHayal aae

kahun use hai wo arsh-qudsi

to baat phir bhi baja nahin hai

zamin walon ki dastaras mein

faraaz-e-arsh-e-ula nahin hai

kahan ye qatra misal-e-dariya

kahan meri manzil-e-talab hai

use samundar qarar deta

magar samundar to pur-ghazab hai

use main baadal ka nam deta

magar ye baadal hai kaisa baadal

tamam sahra taras raha hai

magar kahin aur barsa baadal

main is ko Thahraun raaz-e-pinhan

to zehn ki hai ye na-rasai

hazar fikr-o-nazar ne chaha

samajh mein phir bhi na baat aai

agar kahun main wo aadmi hai

to kam-nigahi ke zaKHm khaun

farishte aadam pe mo'tariz the

use farishta bhi kah na panw

kahun main insan bila-tammul

magar hai insan ka to saya

dayar-e-sidra ki manzilon se

na koi insan guzar ke aaya

wo saz-e-kirdar bhi hain kamtar

hai zikr jin ka kahaniyon mein

kanwal se us ki misal kaisi

kanwal tu khilta hai paniyon mein

kitab kah kar samajhna chahun

to aql ye baat bhi na mane

hikayaton se dalil laun

to sochun qisse main sab purane

agar kahun hai wo lauh-o-kursi

to baat phir bhi nahin hai jachti

main jis se us ko misal deta

koi to aisi misal bachti

kabhi kabhi yun bhi sochta hun

KHuda nahin par KHudai us ki

kabhi kabhi yun bhi sochta hun

ye had nahin intihai us ki

na us ka ham-sar na us ka saya

wo nur wala wo taj wala

hai nabz-e-dauran pe hath us ka

wo kal ka malik wo aaj wala

wo kaun hai us ki intiha kya

KHuda hi samjhe KHuda hi jaane

gharib-o-KHasta magar usi ko

dawa bhi samjhe dua hi jaane

murad jis ki hai jo bhi apni

huzur rabb-e-jalil mange

'said' lekin usi ko chahun

jise dua-e-KHalil mange