mohabbaton ka ye tur-e-sina

suno musāfir

ye dil sahīfa sahī magar is pe chāhatoñ kī

koī kahānī raqam na hogī

ki chāhatoñ kī har ik kahānī udaas āñkhoñ se jhāñktī hai

udaas chehroñ pe hī raqam hai

so merī maano to dil sahīfe ko guzre vaqtoñ kī dāstānoñ se hī sajāo

ye dil kī zarḳhez jo zamīñ hai

tum us pe ḳhushiyoñ ke rañg kā.dho

use gulāboñ se hī sajāo

suno musāfir

mohabbatoñ kā ye tūr-e-sīnā

bhaTakte rahne kā rāsta hai

bahut bulandī pe jaane vāloñ ko manziloñ kī ḳhabar nahīñ hai

ka.ī musāfir bhaTak chuke haiñ

ki un ko raste jhaTak chuke haiñ

har ik musāfir ke rāste meñ na koī jannat na koī dozaḳh

agar milā bhī kisī ko kuchh to

milā hai bas hijr kā hī barzaḳh

haañ kuchh musāfir jo tūr-e-sīnā kī ishq-manzil pe jā ke Thahre

unheñ bhī māyūsiyāñ milī thiiñ

unheñ tajallī nahīñ milī thī

koī tasallī nahīñ milī thī

so vo mohabbat kī āyatoñ ke baġhair lauTe

ināyatoñ ke baġhair lauTe

so ai musāfir

mirī jo maano to lauT aao

ye dil sahīfa sahī magar

us pe chāhatoñ kī koī kahānī raqam na hogī

suno musafir

ye dil sahifa sahi magar is pe chahaton ki

koi kahani raqam na hogi

ki chahaton ki har ek kahani udas aankhon se jhankti hai

udas chehron pe hi raqam hai

so meri mano to dil sahife ko guzre waqton ki dastanon se hi sajao

ye dil ki zarKHez jo zamin hai

tum us pe KHushiyon ke rang kadho

use gulabon se hi sajao

suno musafir

mohabbaton ka ye tur-e-sina

bhaTakte rahne ka rasta hai

bahut bulandi pe jaane walon ko manzilon ki KHabar nahin hai

kai musafir bhaTak chuke hain

ki un ko raste jhaTak chuke hain

har ek musafir ke raste mein na koi jannat na koi dozaKH

agar mila bhi kisi ko kuchh to

mila hai bas hijr ka hi barzaKH

han kuchh musafir jo tur-e-sina ki ishq-manzil pe ja ke Thahre

unhen bhi mayusiyan mili thin

unhen tajalli nahin mili thi

koi tasalli nahin mili thi

so wo mohabbat ki aayaton ke baghair lauTe

inayaton ke baghair lauTe

so ai musafir

meri jo mano to lauT aao

ye dil sahifa sahi magar

us pe chahaton ki koi kahani raqam na hogi