mohammad ka aaKHiri KHutba

mire azīzo

zamān-e-hāzir ke muntaḳhab be-misāl logo

mirī tarīqat pe chalne vaalo

mirī ma.ayyat meñ jis guzargāh par chale ho

bahut kaThin thī

qadam qadam par na.e havādis

tumhāre sach kā ḳhirāj lene

tumhārī rah meñ khaḌe hue the

zavāl-āmāda log

tum se uruuj kī is ghaḌī meñ

aa aa ke pūchhte the

ki jalte sūraj tale aqīde kī chhāñv kab tak javāñ rahegī

ye jāñ-kanī kā azaab kitne baras sahoge

vo be-ḳhabar the

ki jo bhī is raah par chalā hai

vo jabr kī āhanī fasīloñ ko

sang-e-manzil samajh ke baḌhtā chalā gayā hai

jab tumhārā īmān apnī takmīl pā chukā hai

tumhāre andar ke but-kadoñ ke tamām asnām

Dheh chuke haiñ

safar kī saarī sa.ūbatoñ se guzar chuke ho

gavāh rahnā

sadāqatoñ ke amiin logo

gavāh rahnā

ki maiñ ne saarī amānateñ tum ko sauñp dī haiñ

suno

ki ab jo maiñ kah rahā huuñ

yahī vo nusḳha-e-kīmīyā hai

jo zaat ke bandhanoñ se

tum ko rihā.ī degā

tumhāre andar kī sab ḳhalījoñ ko paaT degā

maiñ zindagī kī fasāhatoñ aur balāġhatoñ ko

samajh ke tum se ye kah rahā huuñ

samā.ateñ aur basārteñ qibla-rū karoge

to dekh lenā

basīratoñ ke charāġh

ḳhud hī tumhāre andar ke saare tāqchoñ meñ jal uTheñge

tumheñ ḳhabar hai?

ki zindagī apne zāhirī ḳhadd-o-ḳhāl se kitnī muḳhtalif hai

ki ruuh ke pul tale tumhāre vajūd kā aarzī bahāo

baḌī hī sur.at se bah rahā hai

mere azizo

zaman-e-hazir ke muntaKHab be-misal logo

meri tariqat pe chalne walo

meri mayyat mein jis guzargah par chale ho

bahut kaThin thi

qadam qadam par nae hawadis

tumhaare sach ka KHiraj lene

tumhaari rah mein khaDe hue the

zawal-amada log

tum se uruj ki is ghaDi mein

aa aa ke puchhte the

ki jalte suraj tale aqide ki chhanw kab tak jawan rahegi

ye jaan-kani ka azab kitne baras sahoge

wo be-KHabar the

ki jo bhi is rah par chala hai

wo jabr ki aahani fasilon ko

sang-e-manzil samajh ke baDhta chala gaya hai

jab tumhaara iman apni takmil pa chuka hai

tumhaare andar ke but-kadon ke tamam asnam

Dheh chuke hain

safar ki sari saubaton se guzar chuke ho

gawah rahna

sadaqaton ke amin logo

gawah rahna

ki main ne sari amanaten tum ko saunp di hain

suno

ki ab jo main kah raha hun

yahi wo nusKHa-e-kimiya hai

jo zat ke bandhanon se

tum ko rihai dega

tumhaare andar ki sab KHalijon ko paT dega

main zindagi ki fasahaton aur balaghaton ko

samajh ke tum se ye kah raha hun

samaaten aur basarten qibla-ru karoge

to dekh lena

basiraton ke charagh

KHud hi tumhaare andar ke sare taqchon mein jal uThenge

tumhein KHabar hai?

ki zindagi apne zahiri KHadd-o-KHal se kitni muKHtalif hai

ki ruh ke pul tale tumhaare wajud ka aarzi bahao

baDi hi surat se bah raha hai