nau-jawan KHatun se

hijāb-e-fitna-parvar ab uThā letī to achchhā thā

ḳhud apne husn ko pardā banā letī to achchhā thā

tirī nīchī nazar ḳhud terī ismat kī muhāfiz hai

tū is nashtar kī tezī aazmā letī to achchhā thā

tirī chīn-e-jabīñ ḳhud ik sazā qānūn-e-fitrat meñ

isī shamshīr se kār-e-sazā letī to achchhā thā

ye terā zard ruḳh ye ḳhushk lab ye vahm ye vahshat

tū apne sar se ye bādal haTā letī to achchhā thā

dil-e-majrūh ko majrūh-tar karne se kyā hāsil

tū aañsū poñchh kar ab muskurā letī to achchhā thā

tire zer-e-nagīñ ghar ho mahal ho qasr ho kuchh ho

maiñ ye kahtā huuñ tū arz-o-samā letī to achchhā thā

agar ḳhalvat meñ tū ne sar uThāyā bhī to kyā hāsil

bharī mahfil meñ aa kar sar jhukā letī to achchhā thā

tire māthe kā Tiikā mard kī qismat kā taarā hai

agar tū sāz-e-bedārī uThā letī to achchhā thā

ayaañ haiñ dushmanoñ ke ḳhanjaroñ par ḳhuun ke dhabbe

unheñ tū rañg-e-āriz se milā letī to achchhā thā

sanāneñ khīñch lī haiñ sar-phire bāġhī javānoñ ne

tū sāmān-e-jarāhat ab uThā letī to achchhā thā

tire māthe pe ye āñchal bahut hī ḳhuub hai lekin

tū is āñchal se ik parcham banā letī to achchhā thā

hijab-e-fitna-parwar ab uTha leti to achchha tha

KHud apne husn ko parda bana leti to achchha tha

teri nichi nazar KHud teri ismat ki muhafiz hai

tu is nashtar ki tezi aazma leti to achchha tha

teri chin-e-jabin KHud ek saza qanun-e-fitrat mein

isi shamshir se kar-e-saza leti to achchha tha

ye tera zard ruKH ye KHushk lab ye wahm ye wahshat

tu apne sar se ye baadal haTa leti to achchha tha

dil-e-majruh ko majruh-tar karne se kya hasil

tu aansu ponchh kar ab muskura leti to achchha tha

tere zer-e-nagin ghar ho mahal ho qasr ho kuchh ho

main ye kahta hun tu arz-o-sama leti to achchha tha

agar KHalwat mein tu ne sar uThaya bhi to kya hasil

bhari mahfil mein aa kar sar jhuka leti to achchha tha

tere mathe ka Tika mard ki qismat ka tara hai

agar tu saz-e-bedari uTha leti to achchha tha

ayan hain dushmanon ke KHanjaron par KHun ke dhabbe

unhen tu rang-e-ariz se mila leti to achchha tha

sananen khinch li hain sar-phire baghi jawanon ne

tu saman-e-jarahat ab uTha leti to achchha tha

tere mathe pe ye aanchal bahut hi KHub hai lekin

tu is aanchal se ek parcham bana leti to achchha tha