zohd aur rindi

ik maulvī sāhab kī sunātā huuñ kahānī

tezī nahīñ manzūr tabī.at kī dikhānī

shohra thā bahut aap kī sūfī-manushī kā

karte the adab un kā a.aalī o adānī

kahte the ki pinhāñ hai tasavvuf meñ sharī.at

jis tarah ki alfāz meñ muzmar hoñ ma.ānī

labrez mai-e-zohd se thī dil kī surāhī

thī tah meñ kahīñ durd-e-ḳhayāl-e-hama-dānī

karte the bayāñ aap karāmāt kā apnī

manzūr thī tādād murīdoñ kī baḌhānī

muddat se rahā karte the ham-sā.e meñ mere

thī rind se zāhid kī mulāqāt purānī

hazrat ne mire ek shanāsā se ye pūchhā

'iqbāl' ki hai qumri-e-shamshād-e-ma.ānī

pābandi-e-ahkām-e-sharī.at meñ hai kaisā

go sher meñ hai rashk-e-kalīm-e-hamdānī

suntā huuñ ki kāfir nahīñ hindū ko samajhtā

hai aisā aqīda asar-e-falsafa-dānī

hai us kī tabī.at meñ tashayyo bhī zarā sā

tafzīl-e-alī ham ne sunī us kī zabānī

samjhā hai ki hai raag ibādāt meñ dāḳhil

maqsūd hai maz.hab kī magar ḳhaak uḌānī

kuchh aar use husn-farāmoshoñ se nahīñ hai

aadat ye hamāre shorā kī hai purānī

gaanā jo hai shab ko to sahar ko hai tilāvat

is ramz ke ab tak na khule ham pe ma.ānī

lekin ye sunā apne murīdoñ se hai maiñ ne

be-dāġh hai mānind-e-sahar us kī javānī

majmua-e-azdād hai 'iqbāl' nahīñ hai

dil daftar-e-hikmat hai tabī.at ḳhafaqānī

rindī se bhī āgāh sharī.at se bhī vāqif

pūchho jo tasavvuf kī to mansūr kā saanī

us shaḳhs kī ham par to haqīqat nahīñ khultī

hogā ye kisī aur hī islām kā baanī

al-qissa bahut tuul diyā vaaz ko apne

tā-der rahī aap kī ye naġhz-bayānī

is shahr meñ jo baat ho uḌ jaatī hai sab meñ

maiñ ne bhī sunī apne ahibbā kī zabānī

ik din jo sar-e-rāh mile hazrat-e-zāhid

phir chhiḌ ga.ī bātoñ meñ vahī baat purānī

farmāyā shikāyat vo mohabbat ke sabab thī

thā farz mirā raah sharī.at kī dikhānī

maiñ ne ye kahā koī gila mujh ko nahīñ hai

ye aap kā haq thā ze-rah-e-qurb-e-makānī

ḳham hai sar-e-taslīm mirā aap ke aage

piirī hai tavāzo ke sabab merī javānī

gar aap ko mālūm nahīñ merī haqīqat

paidā nahīñ kuchh is se qusūr-e-hamādānī

maiñ ḳhud bhī nahīñ apnī haqīqat kā shanāsā

gahrā hai mire bahr-e-ḳhayālāt kā paanī

mujh ko bhī tamannā hai ki 'iqbāl' ko dekhūñ

kī us kī judā.ī meñ bahut ashk-fishānī

'iqbāl' bhī 'iqbāl' se āgāh nahīñ hai

kuchh is meñ tamasḳhur nahīñ vallāh nahīñ hai

ek maulwi sahab ki sunata hun kahani

tezi nahin manzur tabiat ki dikhani

shohra tha bahut aap ki sufi-manushi ka

karte the adab un ka aaali o adani

kahte the ki pinhan hai tasawwuf mein shariat

jis tarah ki alfaz mein muzmar hon maani

labrez mai-e-zohd se thi dil ki surahi

thi tah mein kahin durd-e-KHayal-e-hama-dani

karte the bayan aap karamat ka apni

manzur thi tadad muridon ki baDhani

muddat se raha karte the ham-sae mein mere

thi rind se zahid ki mulaqat purani

hazrat ne mere ek shanasa se ye puchha

'iqbaal' ki hai qumri-e-shamshad-e-maani

pabandi-e-ahkaam-e-shariat mein hai kaisa

go sher mein hai rashk-e-kalim-e-hamdani

sunta hun ki kafir nahin hindu ko samajhta

hai aisa aqida asar-e-falsafa-dani

hai us ki tabiat mein tashayyo bhi zara sa

tafzil-e-ali hum ne suni us ki zabani

samjha hai ki hai rag ibaadat mein daKHil

maqsud hai mazhab ki magar KHak uDani

kuchh aar use husn-faramoshon se nahin hai

aadat ye hamare shora ki hai purani

gana jo hai shab ko to sahar ko hai tilawat

is ramz ke ab tak na khule hum pe maani

lekin ye suna apne muridon se hai main ne

be-dagh hai manind-e-sahar us ki jawani

majmua-e-azdad hai 'iqbaal' nahin hai

dil daftar-e-hikmat hai tabiat KHafaqani

rindi se bhi aagah shariat se bhi waqif

puchho jo tasawwuf ki to mansur ka sani

us shaKHs ki hum par to haqiqat nahin khulti

hoga ye kisi aur hi islam ka bani

al-qissa bahut tul diya waz ko apne

ta-der rahi aap ki ye naghz-bayani

is shahr mein jo baat ho uD jati hai sab mein

main ne bhi suni apne ahibba ki zabani

ek din jo sar-e-rah mile hazrat-e-zahid

phir chhiD gai baaton mein wahi baat purani

farmaya shikayat wo mohabbat ke sabab thi

tha farz mera rah shariat ki dikhani

main ne ye kaha koi gila mujh ko nahin hai

ye aap ka haq tha ze-rah-e-qurb-e-makani

KHam hai sar-e-taslim mera aap ke aage

piri hai tawazo ke sabab meri jawani

gar aap ko malum nahin meri haqiqat

paida nahin kuchh is se qusur-e-hamadani

main KHud bhi nahin apni haqiqat ka shanasa

gahra hai mere bahr-e-KHayalat ka pani

mujh ko bhi tamanna hai ki 'iqbaal' ko dekhun

ki us ki judai mein bahut ashk-fishani

'iqbaal' bhi 'iqbaal' se aagah nahin hai

kuchh is mein tamasKHur nahin wallah nahin hai