man tere jaane ke baad

bujh gayā raushan saverā maañ tire jaane ke baa'd

chhā gayā har sū añdherā maañ tire jaane ke baa'd

ġham kā bādal hai ghanerā maañ tire jaane ke baa'd

dam ghuTā jaatā hai merā maañ tire jaane ke baa'd

kis ke chehre meñ talāshūñ tere chehre kī jhalak

kis ke āñchal meñ milegī terī mamtā kī mahak

kis kī bātoñ meñ sunūñgī tere lahje kī khanak

kis sitāre meñ basegī terī āñkhoñ kī chamak

DhūñDhtī huuñ aks terā maañ tire jaane ke baa'd

dam ghuTā jaatā hai merā maañ tire jaane ke baa'd

phone par kis ko sunā.ūñgī maiñ apnā hāl-e-zār

kis kī bāteñ sun ke aa.egā mire dil ko qarār

kaun poñchhegā mire bahte hue ashkoñ kī dhaar

kaun paanī paḌh ke degā hogā jab mujh ko buḳhār

dil meñ vahshat kā baserā maañ tire jaane ke baa'd

dam ghuTā jaatā hai merā maañ tire jaane ke baa'd

kaun ab mere liye dast-e-duā phailā.egā

kis tarah āfāt kā sadqa utārā jā.egā

kaun marham zaḳhm-e-jāñ par pyaar se rakh pā.egā

dard kī shiddat meñ merī piiTh ko sahlā.egā

ranj-o-ġham ne mujh ko gherā maañ tire jaane ke baa'd

dam ghuTā jaatā hai merā maañ tire jaane ke baa'd

ai karachi ye batā ab kis se milne ā.ūñgī

kis kī bāñhoñ meñ simaT kar chain o sukh maiñ pā.ūñgī

maañ tirī furqat kā sadma maiñ nahīñ sah pā.ūñgī

kis tarah yādoñ se terī apnā dil bahlā.ūñgī

kal-adam maike kā pherā maañ tire jaane ke baa'd

dam ghuTā jaatā hai merā maañ tire jaane ke baa'd

tū to bāġh-e-ḳhuld meñ mehmān-e-yazdāñ ho ga.ī

aur yahāñ par merī duniyā pal meñ vīrāñ ho ga.ī

daf.atan izn-e-safar par ḳhalaq hairāñ ho ga.ī

zindagī bhī ek lamha ko pareshāñ ho ga.ī

ghar meñ ḳhāmoshī kā Derā maañ tire jaane ke baa'd

dam ghuTā jaatā hai merā maañ tire jaane ke baa'd

maġhfirat kī tujh pe maulā ab farāvānī kare

jannat-ul-firdaus meñ bhī rahmat arzānī kare

sabza-e-naurasta us ghar kī nigahbānī kare

āsmāñ terī lahad par shabnam afshānī kare

haq adā kar paañv terā maañ tire jaane ke baa'd

dam ghuTā jaatā hai merā maañ tire jaane ke baa'd

bujh gaya raushan sawera man tere jaane ke ba'd

chha gaya har su andhera man tere jaane ke ba'd

gham ka baadal hai ghanera man tere jaane ke ba'd

dam ghuTa jata hai mera man tere jaane ke ba'd

kis ke chehre mein talashun tere chehre ki jhalak

kis ke aanchal mein milegi teri mamta ki mahak

kis ki baaton mein sunungi tere lahje ki khanak

kis sitare mein basegi teri aankhon ki chamak

DhunDhti hun aks tera man tere jaane ke ba'd

dam ghuTa jata hai mera man tere jaane ke ba'd

phone par kis ko sunaungi main apna haal-e-zar

kis ki baaten sun ke aaega mere dil ko qarar

kaun ponchhega mere bahte hue ashkon ki dhaar

kaun pani paDh ke dega hoga jab mujh ko buKHar

dil mein wahshat ka basera man tere jaane ke ba'd

dam ghuTa jata hai mera man tere jaane ke ba'd

kaun ab mere liye dast-e-dua phailaega

kis tarah aafat ka sadqa utara jaega

kaun marham zaKHm-e-jaan par pyar se rakh paega

dard ki shiddat mein meri piTh ko sahlaega

ranj-o-gham ne mujh ko ghera man tere jaane ke ba'd

dam ghuTa jata hai mera man tere jaane ke ba'd

ai karachi ye bata ab kis se milne aaungi

kis ki banhon mein simaT kar chain o sukh main paungi

man teri furqat ka sadma main nahin sah paungi

kis tarah yaadon se teri apna dil bahlaungi

kal-adam maike ka phera man tere jaane ke ba'd

dam ghuTa jata hai mera man tere jaane ke ba'd

tu to bagh-e-KHuld mein mehman-e-yazdan ho gai

aur yahan par meri duniya pal mein viran ho gai

dafatan izn-e-safar par KHalaq hairan ho gai

zindagi bhi ek lamha ko pareshan ho gai

ghar mein KHamoshi ka Dera man tere jaane ke ba'd

dam ghuTa jata hai mera man tere jaane ke ba'd

maghfirat ki tujh pe maula ab farawani kare

jannat-ul-firdaus mein bhi rahmat arzani kare

sabza-e-naurasta us ghar ki nigahbani kare

aasman teri lahad par shabnam afshani kare

haq ada kar panw tera man tere jaane ke ba'd

dam ghuTa jata hai mera man tere jaane ke ba'd