moti

motī vo ham ne paayā

partav se jis ke mukhḌā jīvan kā muskurāyā

dhartī pe nuur bikhrā ākāsh jagmagāyā

tārīkiyoñ meñ ġham kī jis ne kiyā ujālā

be-tāb āñsuoñ kā hañstā huā vo hāsil

tūfān-e-zindagī kā vo pur-sukūn sāhil

vo bahr-e-be-karāñ kī mavvājiyoñ kā paalā

vo husn-e-sarmadī kā Thahrā huā safīna

vo ḳhātam-e-mohabbat kā jāvedāñ nagīna

ġham ne jise tarāshā ishrat ne jis ko Dhālā

vo gosh-e-ārzū kā āveza-e-mutahhar

siina pe aabrū ke vo haikal-e-munavvar

vo charḳh-e-zindagī kā damkā huā sitārā

har chashm-e-jauharī kā maqsūd thā ye motī

mandir meñ motiyoñ ke ma.abūd thā ye motī

hasrat se muntazir thī har tābnāk maalā

vo tal.at-e-sabāhī vo ishrat-e-shabāna

vo vaqt kī amānat vo daulat-e-zamāna

raste meñ chalte chalte jugnū sā jagmagāyā

motī vo ham ne paayā

moti wo hum ne paya

partaw se jis ke mukhDa jiwan ka muskuraya

dharti pe nur bikhra aakash jagmagaya

tarikiyon mein gham ki jis ne kiya ujala

be-tab aansuon ka hansta hua wo hasil

tufan-e-zindagi ka wo pur-sukun sahil

wo bahr-e-be-karan ki mawwajiyon ka pala

wo husn-e-sarmadi ka Thahra hua safina

wo KHatam-e-mohabbat ka jawedan nagina

gham ne jise tarasha ishrat ne jis ko Dhaala

wo gosh-e-arzu ka aaweza-e-mutahhar

sina pe aabru ke wo haikal-e-munawwar

wo charKH-e-zindagi ka damka hua sitara

har chashm-e-jauhari ka maqsud tha ye moti

mandir mein motiyon ke mabud tha ye moti

hasrat se muntazir thi har tabnak mala

wo talat-e-sabahi wo ishrat-e-shabana

wo waqt ki amanat wo daulat-e-zamana

raste mein chalte chalte jugnu sa jagmagaya

moti wo hum ne paya