muazziz shair ki kaenat

tumhāre dil kī sañg-lāḳh vaadī meñ

dushvār-guzār aur pur-pech rāstoñ ke beach

kahīñ kisī maqām par

ek shikasta-hāl jhoñpaḌī garm havā ke thapeḌoñ se

apnī zañg-ālūd meḳhoñ ke bal par

vaise hī phaḌphaḌā rahī hai

jaise diye kī jāñ-ba-lab lau

añdheroñ ko shikast dene ke ba.ad bujhne lagtī hai

jin lahroñ aur un se janm lene vaalī āvāzoñ ko

sañg-dil shā.ir phaḌphaḌāhaT se ta.abīr kar rahā hai

vo sañg-lāḳh vaadī kā dukh hai

aur shikasta-hāl jhoñpaḌī ek muazziz shā.ir kī kā.enāt hai

*

fitrat ke hāshiya-navīsoñ ne

chand bosīda ḳhvāhishāt kī ka.ī phaTī chādareñ oḌh kar

ḳhud ko fitrat ke rañgoñ meñ rañgne se

apne ta.iiñ camouflage kar liyā hai

kyā vo kaTī phaTī chādaroñ se

pattharoñ ko rote bilakte nahīñ dekh sakte

fitrat ne un ko bhī pighal jaane kī kamzorī se āshnā kiyā hai

lekin vo shā.irī nahīñ karte

*

duniyā ke tamām shā.ir

kurra-e-arz par pattharoñ ke mābadoñ meñ mahbūs haiñ

lekin vo un se nazreñ churā kar

atrāf meñ khil uThne vaale rañgīn shagūfoñ kī

tahrīrī musavvirī meñ magan haiñ

shā.ir se behtar kaun jaan saktā hai

ki arzī kokh se insān kā janm mashaqqat meñ huā hai

aur use zindagī is tarah dī ga.ī hai

jaise koī shikasta-hāl jhoñpaḌī meñ dāḳhil ho

*

bosīda ḳhvāhishāt kī kaTī phaTī chādareñ oḌhne vaale

ḳhud ko muazziz samajhne par musir hai

ai dil meñ sañg-lāḳh vaadī ta.amīr karne vaale mahbūb

kyā tum unheñ ye batā sakte ho

ki pattharoñ kā husn lā-zavāl hotā hai

tumhaare dil ki sang-laKH wadi mein

dushwar-guzar aur pur-pech raston ke beach

kahin kisi maqam par

ek shikasta-haal jhonpaDi garm hawa ke thapeDon se

apni zang-alud meKHon ke bal par

waise hi phaDphaDa rahi hai

jaise diye ki jaan-ba-lab lau

andheron ko shikast dene ke baad bujhne lagti hai

jin lahron aur un se janm lene wali aawazon ko

sang-dil shair phaDphaDahaT se tabir kar raha hai

wo sang-laKH wadi ka dukh hai

aur shikasta-haal jhonpaDi ek muazziz shair ki kaenat hai

*

fitrat ke hashiya-nawison ne

chand bosida KHwahishat ki kai phaTi chadaren oDh kar

KHud ko fitrat ke rangon mein rangne se

apne tain camouflage kar liya hai

kya wo kaTi phaTi chadaron se

pattharon ko rote bilakte nahin dekh sakte

fitrat ne un ko bhi pighal jaane ki kamzori se aashna kiya hai

lekin wo shairi nahin karte

*

duniya ke tamam shair

kurra-e-arz par pattharon ke mabadon mein mahbus hain

lekin wo un se nazren chura kar

atraf mein khil uThne wale rangin shagufon ki

tahriri musawwiri mein magan hain

shair se behtar kaun jaan sakta hai

ki arzi kokh se insan ka janm mashaqqat mein hua hai

aur use zindagi is tarah di gai hai

jaise koi shikasta-haal jhonpaDi mein daKHil ho

*

bosida KHwahishat ki kaTi phaTi chadaren oDhne wale

KHud ko muazziz samajhne par musir hai

ai dil mein sang-laKH wadi tamir karne wale mahbub

kya tum unhen ye bata sakte ho

ki pattharon ka husn la-zawal hota hai