mubarak ho

mubārak ho mirī beTī tujhe shādī mubārak ho

mubārak ho ye shādī ḳhāna-ābādī mubārak ho

tū jis ghar meñ rahe ḳhushiyāñ vahīñ ābād ho jaa.eñ

tū mulk-e-nāz-o-ne'mat kī ho shahzādī mubārak ho

tujhe hāsil hoñ duniyā kī sabhī āsā.isheñ tāham

na kar paa.eñ tasāhul kī tujhe 'aadī mubārak ho

tire sadqe tire maañ baap vaarī sab bahan bhaa.ī

tire qurbāñ tirī sakhiyāñ bhī ai sā'dī mubārak ho

na.ī duniyā nayā maskan na.ī ulfat nayā sājan

tujhe pur-az-masarrat ye hasīñ vaadī mubārak ho

asīr-e-'ishq hotā hai ġham-e-duniyā se vārasta

tujhe ai merī jaañ har ġham se āzādī mubārak ho

sharaf ajdād kā maañ baap kī 'izzat rahe qaa.em

rahe aḳhlāq ke gahnoñ se tū laadī mubārak ho

khileñ ḳhush-rang-o-ḳhushbū-dār ġhunche tere āñgan meñ

ḳhudā tujh ko banā.e naanī aur daadī mubārak ho

rahe paivand hablullāh se paidā na ho furqat

sadā azbar rahe ye dars-e-buniyādī mubārak ho

tirī nasleñ qayāmat tak amiiñ hoñ bāġh-e-ahmad kī

dar-e-maulā pe ye banda hai fariyādī mubārak ho

mubarak ho meri beTi tujhe shadi mubarak ho

mubarak ho ye shadi KHana-abaadi mubarak ho

tu jis ghar mein rahe KHushiyan wahin aabaad ho jaen

tu mulk-e-naz-o-ne'mat ki ho shahzadi mubarak ho

tujhe hasil hon duniya ki sabhi aasaishen taham

na kar paen tasahul ki tujhe 'adi mubarak ho

tere sadqe tere man bap wari sab bahan bhai

tere qurban teri sakhiyan bhi ai sa'di mubarak ho

nai duniya naya maskan nai ulfat naya sajan

tujhe pur-az-masarrat ye hasin wadi mubarak ho

asir-e-'ishq hota hai gham-e-duniya se warasta

tujhe ai meri jaan har gham se aazadi mubarak ho

sharaf ajdad ka man bap ki 'izzat rahe qaem

rahe aKHlaq ke gahnon se tu ladi mubarak ho

khilen KHush-rang-o-KHushbu-dar ghunche tere aangan mein

KHuda tujh ko banae nani aur dadi mubarak ho

rahe paiwand hablullah se paida na ho furqat

sada azbar rahe ye dars-e-buniyaadi mubarak ho

teri naslen qayamat tak amin hon bagh-e-ahmad ki

dar-e-maula pe ye banda hai fariyaadi mubarak ho