مبارک ہو

مبارک ہو مری بیٹی تجھے شادی مبارک ہو

مبارک ہو یہ شادی خانہ آبادی مبارک ہو

تو جس گھر میں رہے خوشیاں وہیں آباد ہو جائیں

تو ملک ناز و نعمت کی ہو شہزادی مبارک ہو

تجھے حاصل ہوں دنیا کی سبھی آسائشیں تاہم

نہ کر پائیں تساہل کی تجھے عادی مبارک ہو

ترے صدقے ترے ماں باپ واری سب بہن بھائی

ترے قرباں تری سکھیاں بھی اے سعدی مبارک ہو

نئی دنیا نیا مسکن نئی الفت نیا ساجن

تجھے پر از مسرت یہ حسیں وادی مبارک ہو

اسیر عشق ہوتا ہے غم دنیا سے وارستہ

تجھے اے میری جاں ہر غم سے آزادی مبارک ہو

شرف اجداد کا ماں باپ کی عزت رہے قائم

رہے اخلاق کے گہنوں سے تو لادی مبارک ہو

کھلیں خوش رنگ و خوشبو دار غنچے تیرے آنگن میں

خدا تجھ کو بنائے نانی اور دادی مبارک ہو

رہے پیوند حبل اللہ سے پیدا نہ ہو فرقت

سدا ازبر رہے یہ درس بنیادی مبارک ہو

تری نسلیں قیامت تک امیں ہوں باغ احمد کی

در مولا پہ یہ بندہ ہے فریادی مبارک ہو