mufahamat

nasheb-e-arz pe zarroñ ko mushta.il pā kar

bulandiyoñ pe safed-o-siyāh mil hī ga.e

jo yādgār the bāham satīza-kārī kī

ba-faiz-e-vaqt vo dāman ke chaak sil hī ga.e

jihād ḳhatm huā daur-e-āshtī aayā

sambhal ke baiTh ga.e mahmaloñ meñ dīvāne

hujūm tishna-labāñ kī nigāh se ojhal

chhalak rahe haiñ sharāb-e-havas ke paimāne

ye jashn jashn-e-masarrat nahīñ tamāshā hai

na.e libās meñ niklā hai rahzanī kā julūs

hazār sham-e-uḳhuvvat bujhā ke chamke haiñ

ye tīrgī ke ubhāre hue hasīñ fānūs

ye shāḳh-e-nūr jise zulmatoñ ne sīñchā hai

agar phalī to sharāroñ ke phuul lā.egī

ye phal sakī to na.ī fasl-e-gul ke aane tak

zamīr-e-arz meñ ik zahr chhoḌ jā.egī

nasheb-e-arz pe zarron ko mushtail pa kar

bulandiyon pe safed-o-siyah mil hi gae

jo yaadgar the baham satiza-kari ki

ba-faiz-e-waqt wo daman ke chaak sil hi gae

jihad KHatm hua daur-e-ashti aaya

sambhal ke baiTh gae mahmalon mein diwane

hujum tishna-laban ki nigah se ojhal

chhalak rahe hain sharab-e-hawas ke paimane

ye jashn jashn-e-masarrat nahin tamasha hai

nae libas mein nikla hai rahzani ka julus

hazar sham-e-uKHuwwat bujha ke chamke hain

ye tirgi ke ubhaare hue hasin fanus

ye shaKH-e-nur jise zulmaton ne sincha hai

agar phali to shararon ke phul laegi

ye phal saki to nai fasl-e-gul ke aane tak

zamir-e-arz mein ek zahr chhoD jaegi