mughal ki car

alag duniyā kī caroñ se muġhal kī car hai pyāre

sunā hai pichhle das sāloñ se ye bīmār hai pyāre

zamāne ke liye ibrat kā ik shahkār hai pyāre

muġhal ke vāste ik mustaqil āzār hai pyāre

kisī bhī car se zinhār chaal is kī nahīñ miltī

ye vo shai hai ki duniyā meñ misāl is kī nahīñ miltī

ka.ī farlāñg tak dhakkā lagāte haiñ to chaltī hai

pasīna chaar chhe sāthī bahāte haiñ to chaltī hai

sahar se shaam tak haindle ghumāte haiñ to chaltī hai

sar us ke sāmne apnā jhukāte haiñ to chaltī hai

taras khā kar muġhal par jab bhī ye aatī hai harakat meñ

yaqīñ karnā hī paḌtā hai baḌī tāqat hai qudrat meñ

ye chaltī hai to shofar ko bhalā kab hosh rahtā hai

har ik rahgīr tā-hadd-e-nazar rū-posh rahtā hai

jahāñ bhī us kā jo purza hai vo pur-josh rahtā hai

magar ik horn hai kam-baḳht jo ḳhāmosh rahtā hai

koī ab us kī fitrat kā lagā.e ḳhaak andāza

gear us kā badalte haiñ to khul jaatā hai darvāza

kareñ revers to afsos ye aage ko chaltī hai

dabāte haiñ clutch is kā to battī is kī jaltī hai

agar multān jaanā ho to bhakkar jā nikaltī hai

jo pahiyoñ ke tale īñTeñ rakheñ ye tab sambhaltī hai

muġhal gaaḌī ke har ik vasf kā idrāk rakhte haiñ

jabhī to car meñ īñToñ kā vo stock rakhte haiñ

haiñ is meñ jis qadar seateñ vo spriñgoñ se ḳhālī haiñ

gumāñ hotā hai āsār-e-qadīma se nikālī haiñ

hujūm-e-dostāñ ne dhajjiyāñ is kī uḌā lī haiñ

vo har ik baiThne vaale se kapḌe kī savālī haiñ

pareshāñ us kā shīrāza har ik kal us kī be-kal hai

ye vo gaaḌī hai jo fankār kī taḳhlīq-e-avval hai

ise raste meñ bas taqdīr hī roke to ruktī hai

muġhal kī aah par tāsīr hī roke to ruktī hai

hamārā nāla-e-dil-gīr hī roke to ruktī hai

vagarna phir koī ḳhinzīr hī roke to ruktī hai

mire yaaro jahāñ ye jānvar kam-pāya jaatā

ḳhudā jaane vahāñ kaise ise Thahrāyā jaatā

alag duniya ki caron se mughal ki car hai pyare

suna hai pichhle das salon se ye bimar hai pyare

zamane ke liye ibrat ka ek shahkar hai pyare

mughal ke waste ek mustaqil aazar hai pyare

kisi bhi car se zinhaar chaal is ki nahin milti

ye wo shai hai ki duniya mein misal is ki nahin milti

kai farlang tak dhakka lagate hain to chalti hai

pasina chaar chhe sathi bahate hain to chalti hai

sahar se sham tak haindle ghumate hain to chalti hai

sar us ke samne apna jhukate hain to chalti hai

taras kha kar mughal par jab bhi ye aati hai harakat mein

yaqin karna hi paDta hai baDi taqat hai qudrat mein

ye chalti hai to shofar ko bhala kab hosh rahta hai

har ek rahgir ta-hadd-e-nazar ru-posh rahta hai

jahan bhi us ka jo purza hai wo pur-josh rahta hai

magar ek horn hai kam-baKHt jo KHamosh rahta hai

koi ab us ki fitrat ka lagae KHak andaza

gear us ka badalte hain to khul jata hai darwaza

karen rewers to afsos ye aage ko chalti hai

dabaate hain clutch is ka to batti is ki jalti hai

agar multan jaana ho to bhakkar ja nikalti hai

jo pahiyon ke tale inTen rakhen ye tab sambhalti hai

mughal gaDi ke har ek wasf ka idrak rakhte hain

jabhi to car mein inTon ka wo stock rakhte hain

hain is mein jis qadar seaten wo springon se KHali hain

guman hota hai aasar-e-qadima se nikali hain

hujum-e-dostan ne dhajjiyan is ki uDa li hain

wo har ek baiThne wale se kapDe ki sawali hain

pareshan us ka shiraaza har ek kal us ki be-kal hai

ye wo gaDi hai jo fankar ki taKHliq-e-awwal hai

ise raste mein bas taqdir hi roke to rukti hai

mughal ki aah par tasir hi roke to rukti hai

hamara nala-e-dil-gir hi roke to rukti hai

wagarna phir koi KHinzir hi roke to rukti hai

mere yaro jahan ye jaanwar kam-paya jata

KHuda jaane wahan kaise ise Thahraya jata