muhajir parindon ka swagat

duniyā

maiñ apnā saarā husn

terī hathelī par rakh detā huuñ

aur tū apnā saarā zahr

mere andar uñDel detī hai

jāntī hai naañ

maiñ ziyādā der ḳhālī nahīñ rah saktā

merī guuñj mujhe apnī lapeT meñ liye rakhtī hai

sahmā paḌā rahtā huuñ der der tak apne hī andar

apne ḳhālī pan ke sannāTe meñ

yā phir dhamā-chokaḌī kartī an-kahī nazmoñ ke shor meñ

chup chaap baiTh rahtā huuñ apne saath

kyā azīyat hai?

apne aap se milte hue

ḳhud-kalāmī bhī nahīñ ho paatī mujh se!

''boltā huuñ to lafz zamīñ par girte haiñ''

reza reza harf chun kar āñkhoñ se chūmtā huuñ

ki apnī samt lauTte samay

maiñ unheñ rauñd kar nahīñ guzar saktā

so kohar kī dhund meñ ghire hue

muhājir parindoñ ke par uThā laatā huuñ

apnī kitāb meñ rakhne ke liye

tab apnā sūnā-pan achchhā lagne lagtā hai

jab lafz parindoñ kī tarah mere aas paas

uḌte phirte haiñ

un ke rizq se bharā rahtā hai merā bātin

vo apnī nannhī nannhī choñcheñ khol kar

mere vajūd se apne ma.ānī chugte haiñ

unhī kī chahkār le ke aatā huuñ

maiñ tere liye merī pyārī duniyā!!!

duniya

main apna sara husn

teri hatheli par rakh deta hun

aur tu apna sara zahr

mere andar unDel deti hai

jaanti hai nan

main ziyaada der KHali nahin rah sakta

meri gunj mujhe apni lapeT mein liye rakhti hai

sahma paDa rahta hun der der tak apne hi andar

apne KHali pan ke sannaTe mein

ya phir dhama-chokaDi karti an-kahi nazmon ke shor mein

chup chap baiTh rahta hun apne sath

kya aziyat hai?

apne aap se milte hue

KHud-kalami bhi nahin ho pati mujh se!

bolta hun to lafz zamin par girte hain

reza reza harf chun kar aankhon se chumta hun

ki apni samt lauTte samay

main unhen raund kar nahin guzar sakta

so kohar ki dhund mein ghire hue

muhajir parindon ke par uTha lata hun

apni kitab mein rakhne ke liye

tab apna suna-pan achchha lagne lagta hai

jab lafz parindon ki tarah mere aas pas

uDte phirte hain

un ke rizq se bhara rahta hai mera baatin

wo apni nannhi nannhi chonchen khol kar

mere wajud se apne maani chugte hain

unhi ki chahkar le ke aata hun

main tere liye meri pyari duniya!!!