muhasba

havā kahīñ naam ko nahīñ thī

azān-e-maġhrib se din kī paspā sipāh kā dil dhaḌak rahā thā

tamām rañgoñ ke imtiyāzāt miT chuke the

har ek shai kī siyah qabā thī

jagah jagah bām-o-dar ke paikar

ufuq ke rañgīn chaukhaTe meñ

misāl-e-tasvīr jam ga.e the

shajar hajar sab ke sab girebāñ meñ sar jhukā.e

muhāsba kar rahe the din bhar ke nek o bad kā

tavīl qāmat hazīñ khajūreñ

kaTī huī sā.atoñ ke mātam meñ

baal khole hue khaḌī thiiñ

nashemanoñ ko palaTte taa.ir

kuchh aise tham tham ke uḌ rahe the

ki safha-e-āsmāñ pe goyā

sarāb-e-parvāz ban ga.e the

idhar mirā dil

dhaḌak dhaḌak kar

ajiib ibrat bharī nadāmat se sochtā thā

ki aaj kā din bhī kaT gayā hai

hawa kahin nam ko nahin thi

azan-e-maghrib se din ki paspa sipah ka dil dhaDak raha tha

tamam rangon ke imtiyazat miT chuke the

har ek shai ki siyah qaba thi

jagah jagah baam-o-dar ke paikar

ufuq ke rangin chaukhaTe mein

misal-e-taswir jam gae the

shajar hajar sab ke sab gireban mein sar jhukae

muhasba kar rahe the din bhar ke nek o bad ka

tawil qamat hazin khajuren

kaTi hui saaton ke matam mein

baal khole hue khaDi thin

nashemanon ko palaTte tair

kuchh aise tham tham ke uD rahe the

ki safha-e-asman pe goya

sarab-e-parwaz ban gae the

idhar mera dil

dhaDak dhaDak kar

ajib ibrat bhari nadamat se sochta tha

ki aaj ka din bhi kaT gaya hai