muhasba

achchhā ḳhāsā ghar thā lekin ujaḌ gayā

vāldain ke intiqāl ke ba.ad

donoñ bhaa.ī apnī lāDlī aur iklautī

bahan kī shādī kar ke

mulk se bāhar chale ga.e

lāhorī ābā.ī makān meñ

sarf chachā sultān akele rahte the

jin kī ghanī nūrānī dāḌhī

ḳhauf-e-ḳhudā se hiltī rahtī thī

parvez italy meñ

dāñtoñ ke amrāz kā māhir ban ke rahā

ab us kī qismat kā sitāra

burj-e-sukūn meñ

jag-mag jag-mag chamak rahā thā

mumtāz espen meñ

jaa.ez aur nā-jā.ez chīzeñ

dar-āmad barāmad kar ke

rizq-e-halāl aur akl-e-harām kamātā thā

us ke jānñe vāloñ meñ

kuchh aise vaise log bhī shāmil the

magar apnī apnī pardesī duniyāoñ meñ

donoñ ārām se the

chhoTe ke paiham isrār

aur qartaba ġharnāta ke asrār

se haar ke

baḌā kashāñ kashāñ chalā aayā thā

saat baras meñ pahlī baar

vo saath saath chhuTTiyāñ guzār rahe the

nārāz aur mavvāj

pāniyoñ ke paḌos meñ

shor-sharābe vaalī

gunjān ābādī se

zarā haT kar

ek ḳhush-numā pahāḌī par

das biis makānāt hoñge

sab se achchhā mumtāz kā thā

ek roz vo sayyāhī se

thake thakā.e

raat ga.e ghar aa.e

apne lawn meñ

nekar pahne Taañg pasāre

paas paḌe mobile par

nazar jamā.e kaan lagā.e

visky piite rahe

chāñd nashe meñ thā

aur samundar se

pighlī chāñdī chhalak rahī thī

aisā tilismī manzar aur itnā āsmān

aahoñ ne kabhī na dekhā thā

lekin parvez ke daure kī

ek aur vaj.h bhī thī

tiis baras tak

do rūhoñ ke shab-ḳhānoñ meñ

ajab tarah kī pāgal nafrat paltī rahī

aur apnā zahr ugaltī rahī

vo badle kī aag meñ jalte

añgāroñ par chalte rahe

isī liye koī das din pahle

is sāzish ne janam liyā thā

aur mumtāz ne kisī purāne

kārobārī ''sāthī'' se

ḳhuun kā saudā kar Daalā thā

aaj usī kā sandesā aane vaalā thā

os utartī raat guzartī rahī

achānak mobile ne sargoshī kī

bheḌiyā halāl kar diyā gayā

sub.h savere telephone par

bahnoī ne bharrā.ī āvāz sunā.ī dii:

''rātoñ-rāt nā-mālūm afrād

chachā jaan kā galā kaaT ke

bhaag ga.e haiñ

aur police taftīsh vaġhaira''

ye māñ-jā.e ḳhush ho ke

betābī se gale mile

baḌī der tak guthe hue

apne diloñ kī dhak dhak sunte rahe

ik nāpāk darinde ne

apne ma.asūm bhatījoñ se

bad-kārī kā irtikāb kar ke

un kī psychi badal dī thī

achchha KHasa ghar tha lekin ujaD gaya

waldain ke intiqal ke baad

donon bhai apni laDli aur iklauti

bahan ki shadi kar ke

mulk se bahar chale gae

lahori aabai makan mein

sarf chacha sultan akele rahte the

jin ki ghani nurani daDhi

KHauf-e-KHuda se hilti rahti thi

parwez italy mein

danton ke amraaz ka mahir ban ke raha

ab us ki qismat ka sitara

burj-e-sukun mein

jag-mag jag-mag chamak raha tha

mumtaz espen mein

jaez aur na-jaez chizen

dar-amad baramad kar ke

rizq-e-halal aur akl-e-haram kamata tha

us ke jaanne walon mein

kuchh aise waise log bhi shamil the

magar apni apni pardesi duniyaon mein

donon aaram se the

chhoTe ke paiham israr

aur qartaba gharnata ke asrar

se haar ke

baDa kashan kashan chala aaya tha

sat baras mein pahli bar

wo sath sath chhuTTiyan guzar rahe the

naraaz aur mawwaj

paniyon ke paDos mein

shor-sharabe wali

gunjaan aabaadi se

zara haT kar

ek KHush-numa pahaDi par

das bis makanat honge

sab se achchha mumtaz ka tha

ek roz wo sayyahi se

thake thakae

raat gae ghar aae

apne lawn mein

nekar pahne Tang pasare

pas paDe mobile par

nazar jamae kan lagae

wisky pite rahe

chand nashe mein tha

aur samundar se

pighli chandi chhalak rahi thi

aisa tilismi manzar aur itna aasman

aahon ne kabhi na dekha tha

lekin parwez ke daure ki

ek aur wajh bhi thi

tis baras tak

do ruhon ke shab-KHanon mein

ajab tarah ki pagal nafrat palti rahi

aur apna zahr ugalti rahi

wo badle ki aag mein jalte

angaron par chalte rahe

isi liye koi das din pahle

is sazish ne janam liya tha

aur mumtaz ne kisi purane

karobari sathi se

KHun ka sauda kar Dala tha

aaj usi ka sandesa aane wala tha

os utarti raat guzarti rahi

achanak mobile ne sargoshi ki

bheDiya halal kar diya gaya

subh sawere telephone par

bahnoi ne bharrai aawaz sunai di:

raaton-raat na-malum afrad

chacha jaan ka gala kaT ke

bhag gae hain

aur police taftish waghaira

ye man-jae KHush ho ke

betabi se gale mile

baDi der tak guthe hue

apne dilon ki dhak dhak sunte rahe

ek napak darinde ne

apne masum bhatijon se

bad-kari ka irtikab kar ke

un ki psychi badal di thi