muhaqqiq

ye jo ik hazrat chale aate haiñ goristān se

ye na samjheñ aap haiñ be-zār apnī jaan se

aap ko yūñhī hai āsār-e-qadīma se lagāv

jis tarah chūnā Dalī, katthe ko nisbat paan se

aap ko qabroñ se ulfat ishq vīrāne se hai

aap ghabrāte haiñ jīte-jāgte insān se

koī kitnā hī baḌā ho falsafī shā.er adiib

umr bhar is se rahā karte haiñ aap anjān se

haañ magar jaise hī pā jaatā hai be-chāra vafāt

aap us ko chāhne lagte haiñ jī se jaan se

sūñghte haiñ der tak marhūm kī ḳhāk-e-lahad

phir ye farmāte haiñ uTh kar ālimāna shaan se

tūl-o-arz-e-qabr se ye saaf chaltā hai patā

gorkan aa.e the atrāf-e-balochistan se

ye thā ik ruḳh sāhib-e-tahqīq kī tasvīr kā

dūsrā ruḳh bhī bayāñ kartā huuñ, suniye dhyān se

haiñ ba-zom-e-ḳhud muhaqqiq aap hindostān ke

aap ne nuqte gine haiñ 'mīr' ke dīvān ke

kāTte haiñ suut ko tahqīq ke itnā mahīn

aap ke aage jolāhe maat haiñ īrān ke

zer-e-tahqīq aap ke rahte haiñ ye sab mas.ale

kis qadar chūhe pale the ghar meñ 'momin'-ḳhān ke

pāñch baj kar pāñch par yā pāñch baj kar saat par

'dāġh' ne toḌā thā dam zaanū pe munnī-jān ke

'rind' ne ik bevafā ke ishq meñ khaa.ī thī jo

vo chhurī ke zaḳhm the yā ghaav the kirpān ke

dhun hai ye sābit kareñ, dillī thā 'miltan' kā vatan

aur 'saudā' ke chachā butcher the inglistān ke

al-ġharaz rahtī hai roz o shab yahī bas ek fikr

koī gul-dasta utāreñ taaq se nisyān ke

ye jo ek hazrat chale aate hain goristan se

ye na samjhen aap hain be-zar apni jaan se

aap ko yunhi hai aasar-e-qadima se lagaw

jis tarah chuna Dali, katthe ko nisbat pan se

aap ko qabron se ulfat ishq virane se hai

aap ghabraate hain jite-jagte insan se

koi kitna hi baDa ho falsafi shaer adib

umr bhar is se raha karte hain aap anjaan se

han magar jaise hi pa jata hai be-chaara wafat

aap us ko chahne lagte hain ji se jaan se

sunghte hain der tak marhum ki KHak-e-lahad

phir ye farmate hain uTh kar aalimana shan se

tul-o-arz-e-qabr se ye saf chalta hai pata

gorkan aae the atraf-e-balochistan se

ye tha ek ruKH sahib-e-tahqiq ki taswir ka

dusra ruKH bhi bayan karta hun, suniye dhyan se

hain ba-zom-e-KHud muhaqqiq aap hindostan ke

aap ne nuqte gine hain 'mir' ke diwan ke

kaTte hain sut ko tahqiq ke itna mahin

aap ke aage jolahe mat hain iran ke

zer-e-tahqiq aap ke rahte hain ye sab masale

kis qadar chuhe pale the ghar mein 'momin'-KHan ke

panch baj kar panch par ya panch baj kar sat par

'dagh' ne toDa tha dam zanu pe munni-jaan ke

'rind' ne ek bewafa ke ishq mein khai thi jo

wo chhuri ke zaKHm the ya ghaw the kirpan ke

dhun hai ye sabit karen, dilli tha 'miltan' ka watan

aur 'sauda' ke chacha butcher the inglistan ke

al-gharaz rahti hai roz o shab yahi bas ek fikr

koi gul-dasta utaren taq se nisyan ke