mujassama

maiñ ek patthar

maiñ ek be-jān sard patthar

jumūd-e-begāñgī kā maz.har

azal se hadd-e-nazar ko taktī huī nigāheñ

ḳhalā meñ laTkī huī ye bāheñ

zamīñ mujhe saath le ke dushvār manzileñ lākhoñ ghuum aa.ī

karoḌoñ rāhoñ ko chuum aa.ī

falak ke sāhir ne kitne afsūn mujh pe phūñke

mire pas-o-pesh TimTimāte diye jalā.e

dhueñ ke gahre hisār bāñdhe

ḳhudā-e-mausam ne harba-hā-e-bahār se mujh ko āzmāyā

ḳhizāñ kī saffāk uñgliyoñ kā hadaf banāyā

magar mirī be-hisī ne har ek hamla-āvar kā sar jhukāyā

isī guzargāh par huuñ istāda aur shāyad yahīñ rahūñgā

jahāñ se guzre dhaḌakte lamhoñ ke kārvāñ

dhīme sur meñ gaate

hayāt-e-nā-pā.edār ke marsiye sunāte

mire badan kī amiiq sardī ko sard se sard-tar banāte

maiñ kitnī sadiyoñ se sochtā huuñ

ki koī jumbish

zarā sī larzish

agar mirī munjamid ragoñ meñ ḳhudī kī dhīmī sī aañch bhar de

ye aañch lahrā ke kyā na kar de!

main ek patthar

main ek be-jaan sard patthar

jumud-e-begangi ka mazhar

azal se hadd-e-nazar ko takti hui nigahen

KHala mein laTki hui ye bahen

zamin mujhe sath le ke dushwar manzilen lakhon ghum aai

karoDon rahon ko chum aai

falak ke sahir ne kitne afsun mujh pe phunke

mere pas-o-pesh TimTimate diye jalae

dhuen ke gahre hisar bandhe

KHuda-e-mausam ne harba-ha-e-bahaar se mujh ko aazmaya

KHizan ki saffak ungliyon ka hadaf banaya

magar meri be-hisi ne har ek hamla-awar ka sar jhukaya

isi guzargah par hun istada aur shayad yahin rahunga

jahan se guzre dhaDakte lamhon ke karwan

dhime sur mein gate

hayat-e-na-paedar ke marsiye sunate

mere badan ki amiq sardi ko sard se sard-tar banate

main kitni sadiyon se sochta hun

ki koi jumbish

zara si larzish

agar meri munjamid ragon mein KHudi ki dhimi si aanch bhar de

ye aanch lahra ke kya na kar de!