mujhe afsos hota hai

mujhe afsos hotā hai

ki jab tiktok par jaun eliyā kī ruuh ke mujrim

kirā.e kī hasīnāoñ ko kuchh nazmeñ sunāte haiñ

adab ke sab qarīnoñ ko vo yaksar bhuul jaate haiñ

aur us video ko shohrat ke liye ziina banāte haiñ

mujhe afsos hotā hai

ki jab stage par jaun eliyā kī ruuh ke mujrim

ye bad-shohrat

usī kī khaal chaal aur ruup kā bahrūp bharte haiñ

sadā-kārī bhī karte haiñ adākārī bhī karte haiñ

aur aise sāqit-ul-auzān kamtar she'r paḌhte haiñ

ki jin meñ laḌkiyoñ laḌkoñ kā ochhā zikr hotā hai

barā.e ahl-e-'ilm-o-fan jo qatl-e-fikr hotā hai

ki jis ko sun ke arfa' shā'irī se nā-balad bachche

bajā kar tāliyāñ kuchh is tarah se daad dete haiñ

ki jaise apne bachpan meñ

vo bandar kā tamāsha dekh kar taalī bajāte the

mujhe afsos hota hai

ki jab tiktok par jaun eliya ki ruh ke mujrim

kirae ki hasinaon ko kuchh nazmen sunate hain

adab ke sab qarinon ko wo yaksar bhul jate hain

aur us wideo ko shohrat ke liye zina banate hain

mujhe afsos hota hai

ki jab stage par jaun eliya ki ruh ke mujrim

ye bad-shohrat

usi ki khaal chaal aur rup ka bahrup bharte hain

sada-kari bhi karte hain adakari bhi karte hain

aur aise saqit-ul-auzan kamtar she'r paDhte hain

ki jin mein laDkiyon laDkon ka ochha zikr hota hai

barae ahl-e-'ilm-o-fan jo qatl-e-fikr hota hai

ki jis ko sun ke arfa' sha'iri se na-balad bachche

baja kar taliyan kuchh is tarah se dad dete hain

ki jaise apne bachpan mein

wo bandar ka tamasha dekh kar tali bajate the