مجھے افسوس ہوتا ہے

مجھے افسوس ہوتا ہے

کہ جب ٹک ٹاک پر جون ایلیا کی روح کے مجرم

کرائے کی حسیناؤں کو کچھ نظمیں سناتے ہیں

ادب کے سب قرینوں کو وہ یکسر بھول جاتے ہیں

اور اس ویڈیو کو شہرت کے لئے زینہ بناتے ہیں

مجھے افسوس ہوتا ہے

کہ جب اسٹیج پر جون ایلیا کی روح کے مجرم

یہ بد شہرت

اسی کی کھال چال اور روپ کا بہروپ بھرتے ہیں

صدا کاری بھی کرتے ہیں اداکاری بھی کرتے ہیں

اور ایسے ساقط الاوزان کمتر شعر پڑھتے ہیں

کہ جن میں لڑکیوں لڑکوں کا اوچھا ذکر ہوتا ہے

برائے اہل علم و فن جو قتل فکر ہوتا ہے

کہ جس کو سن کے ارفع شاعری سے نابلد بچے

بجا کر تالیاں کچھ اس طرح سے داد دیتے ہیں

کہ جیسے اپنے بچپن میں

وہ بندر کا تماشہ دیکھ کر تالی بجاتے تھے