mujhe apna jalwa dikha

sitāre

mujhe apnā jalva dikhā

vaqt ke kis ḳhalā meñ

mazāhir kī kis kahkashāñ meñ

zamāne ke kis dubb-e-akbar meñ

terā Thikāna hai

lākhoñ baras se

tujhe dekhne kī talab meñ

jūñhī shaam Dhaltī hai

maiñ ḳhud-ba-ḳhud khiñchtā aatā huuñ

is ġhār-e-shab meñ!

ajab ġhaar hai

ek bāzār hai

sail-e-lam.āt kā

aa.ine nasb haiñ

rañg uḌte haiñ

shīshoñ ke pīchhe

chamakdār chīzoñ kā ambār hai

reshmīñ thaan khulte haiñ

ek ek kar ke

tahoñ par taheñ

lagtī jaatī haiñ

muqayyash, fardār kapḌoñ kī

ā.ankhoñ meñ

chobī munaqqash chhatoñ se

umañDtī huī raushnī

jhilmilātī hai

lahroñ kī sūrat

zarī jhālaroñ par

mutallā lakīroñ pe

chāñdī ke pannoñ pe

silkī mahīn aur ghane hāshiyoñ par

sitāre damakte haiñ

mavvāj jaalī se

āvāz aatī hai

dekheñ jī

bāzār meñ is se baḌh kar murassā

koī aur kapḌā nahīñ hai

ise jo bhī pahnegā

bilkul sitāra lagegā

sitāre ke mānind chamkegā

kyā maiñ tujhe dekh pā.ūñgā

is lan-tarānī ke gumbad meñ

merī sadā gūñjtī hī rahegī

na jaane tujhe kis ke malbūs par

ḳhvāb kī nok-e-sozan se

Tāñkā gayā hai!!

sitare

mujhe apna jalwa dikha

waqt ke kis KHala mein

mazahir ki kis kahkashan mein

zamane ke kis dubb-e-akbar mein

tera Thikana hai

lakhon baras se

tujhe dekhne ki talab mein

junhi sham Dhalti hai

main KHud-ba-KHud khinchta aata hun

is ghaar-e-shab mein!

ajab ghaar hai

ek bazar hai

sail-e-lamat ka

aaine nasb hain

rang uDte hain

shishon ke pichhe

chamakdar chizon ka ambar hai

reshmin than khulte hain

ek ek kar ke

tahon par tahen

lagti jati hain

muqayyash, fardar kapDon ki

aaankhon mein

chobi munaqqash chhaton se

umanDti hui raushni

jhilmilati hai

lahron ki surat

zari jhaalaron par

mutalla lakiron pe

chandi ke pannon pe

silki mahin aur ghane hashiyon par

sitare damakte hain

mawwaj jali se

aawaz aati hai

dekhen ji

bazar mein is se baDh kar murassa

koi aur kapDa nahin hai

ise jo bhi pahnega

bilkul sitara lagega

sitare ke manind chamkega

kya main tujhe dekh paunga

is lan-tarani ke gumbad mein

meri sada gunjti hi rahegi

na jaane tujhe kis ke malbus par

KHwab ki nok-e-sozan se

Tanka gaya hai!!