mujhe bhul ja

mire sāqiyā mujhe bhuul jā

mire dilrubā mujhe bhuul jā

na vo dil rahā na vo jī rahā

na vo daur-e-aish-o-ḳhushī rahā

na vo rabt-o-zabt-e-dilī rahā

na vo auj-e-tishna-labī rahā

na vo zauq-e-bāda-kashī rahā

maiñ alam-navāz huuñ āj-kal

maiñ shikasta-sāz huuñ āj-kal

maiñ sarāpā raaz huuñ āj-kal

mujhe ab ḳhayāl meñ bhī na milā

mujhe bhuul jā mujhe bhuul jā

mujhe zindagī se azīz-tar

faqat ek terī hī zaat thī

tirī har nigāh mire liye

sabab-e-sukūn-e-hayāt thī

mirī dāstān-e-vafā kabhī

tirī sharh-e-husn-e-sifāt thī

magar ab to rañg hī aur hai

na vo tarz hai na vo taur hai

ye sitam bhī qābil-e-ġhaur hai

tujhe apne husn kā vāsta

mujhe bhuul jā mujhe bhuul jā

qasam iztirāb-e-hayāt kī

mujhe ḳhāmushī meñ qarār hai

mire sahn-e-gulshan-e-ishq meñ

na ḳhizāñ hai ab na bahār hai

yahī dil thā raunaq-e-anjuman

yahī dil charāġh-e-mazār hai

mujhe ab sukūn-e-digar na de

mujhe ab naved-e-sahar na de

mujhe ab fareb-e-nazar na de

na ho vahm-e-ishq meñ mubtalā

mujhe bhuul jā mujhe bhuul jā

mere saqiya mujhe bhul ja

mere dilruba mujhe bhul ja

na wo dil raha na wo ji raha

na wo daur-e-aish-o-KHushi raha

na wo rabt-o-zabt-e-dili raha

na wo auj-e-tishna-labi raha

na wo zauq-e-baada-kashi raha

main alam-nawaz hun aaj-kal

main shikasta-saz hun aaj-kal

main sarapa raaz hun aaj-kal

mujhe ab KHayal mein bhi na mila

mujhe bhul ja mujhe bhul ja

mujhe zindagi se aziz-tar

faqat ek teri hi zat thi

teri har nigah mere liye

sabab-e-sukun-e-hayat thi

meri dastan-e-wafa kabhi

teri sharh-e-husn-e-sifat thi

magar ab to rang hi aur hai

na wo tarz hai na wo taur hai

ye sitam bhi qabil-e-ghaur hai

tujhe apne husn ka wasta

mujhe bhul ja mujhe bhul ja

qasam iztirab-e-hayat ki

mujhe KHamushi mein qarar hai

mere sahn-e-gulshan-e-ishq mein

na KHizan hai ab na bahaar hai

yahi dil tha raunaq-e-anjuman

yahi dil charagh-e-mazar hai

mujhe ab sukun-e-digar na de

mujhe ab nawed-e-sahar na de

mujhe ab fareb-e-nazar na de

na ho wahm-e-ishq mein mubtala

mujhe bhul ja mujhe bhul ja