mujhe kahin aur jaane do

maiñ tumhārā dushman huuñ

maiñ tumhāre jism kā jarsūma huuñ

lekin tumhārī maut aa chukī hai

aur maiñ zinda rahnā chāhtā huuñ

maiñ apne ḳhūñrez panjoñ se

tumhāre chamḌe ko kaaT dūñgā

maiñ phir niklūñgā

maiñ ḳhuun huuñ

aur ḳhuun ko maut nahīñ aatī

qānūn kī rassiyoñ se

tum ne jo jhūlā tayyār kiyā hai

us ke bosīda hone par

tumheñ ghabrāhaT hai

lekin maiñ sirf itnā chāhtā huuñ

ki mujhe kahīñ aur jaane do

merī zindagī tum se alag hai

maiñ nikalnā chāhtā huuñ

ḳhūbsūrat dukānoñ meñ qīmtī sāmān haiñ

aur qīmtī sāmānoñ meñ merī zindagī hai

aur merī zindagī mujh se duur hai

mujhe us ke qarīb jaane do

merī ruuh un chīzoñ meñ hai

aur mujhe aisā lag rahā hai jaise maiñ ḳhvāb dekh rahā huuñ

mujhe kab tak ḳhvāb dekhnā paḌegā

mujhe ḳhvāboñ ko apne hāthoñ meñ lene do

merī āvāz bahut maddham hai

aur īñToñ ko surḳh gard ban kar jhaḌte hue tum ne dekhā hogā

vaqt āvāz hī kā dūsrā naam hai

aur merī aañkh maddham nahīñ bahut tez hai

maiñ āhista rūhoñ

lekin

qadīm pattharoñ kī kahānī paḌho

nāchnā bhuul jāoge

sirf jhūmne meñ ajiib kaifiyat hai

ye aadmī ko bahut andar le kar chalī jaatī hai

aur phir havāoñ kī āvāz

chīzoñ ke liye vaqt ban jaatī hai

ki vaqt har chiiz ke badalne kā naam hai

bachchoñ kī tarah shor mat machāo

madārī vaale ko Damrū bajāne do

aur bachchoñ ko ḳhush hone do

aur aao

ham tum museum meñ chaleñ

vahīñ bāteñ kareñge

guzre vaqtoñ kī bāteñ

aane vaale daur kī bāteñ

vahāñ ḳhāmoshī hogī

ki bhiiḌ to bāzāroñ meñ chalī ga.ī hogī

is haul-nāk sannāTe vaalī jagah se kisī ko kyā dilchaspī hai

us ke sivā jo chīzoñ ke raaz jānñā chāhtā hai

tum mere saath aao

dekho ye museum ye tāj-mahal ye jāma.a masjid

ye vaishālī

ye ashok kā agam kuaañ

ye budh kā mujassama

aur ye aurangzeb kī bujhtī huī talvār

aur ye vo jahāz

jis se angrez bangāl meñ utre the

aur ye ek insān ke qadmoñ kā nishān

kitnā haqīr

kitnā chhoTā

aur aur ye kahāñ kho gayā hai

kahīñ aur gayā hogā

in qadmoñ ne kisī aur safar kā rāsta hamvār kiyā hogā

main tumhaara dushman hun

main tumhaare jism ka jarsuma hun

lekin tumhaari maut aa chuki hai

aur main zinda rahna chahta hun

main apne KHunrez panjon se

tumhaare chamDe ko kaT dunga

main phir niklunga

main KHun hun

aur KHun ko maut nahin aati

qanun ki rassiyon se

tum ne jo jhula tayyar kiya hai

us ke bosida hone par

tumhein ghabrahaT hai

lekin main sirf itna chahta hun

ki mujhe kahin aur jaane do

meri zindagi tum se alag hai

main nikalna chahta hun

KHubsurat dukanon mein qimti saman hain

aur qimti samanon mein meri zindagi hai

aur meri zindagi mujh se dur hai

mujhe us ke qarib jaane do

meri ruh un chizon mein hai

aur mujhe aisa lag raha hai jaise main KHwab dekh raha hun

mujhe kab tak KHwab dekhna paDega

mujhe KHwabon ko apne hathon mein lene do

meri aawaz bahut maddham hai

aur inTon ko surKH gard ban kar jhaDte hue tum ne dekha hoga

waqt aawaz hi ka dusra nam hai

aur meri aankh maddham nahin bahut tez hai

main aahista ruhon

lekin

qadim pattharon ki kahani paDho

nachna bhul jaoge

sirf jhumne mein ajib kaifiyat hai

ye aadmi ko bahut andar le kar chali jati hai

aur phir hawaon ki aawaz

chizon ke liye waqt ban jati hai

ki waqt har chiz ke badalne ka nam hai

bachchon ki tarah shor mat machao

madari wale ko Damru bajaane do

aur bachchon ko KHush hone do

aur aao

hum tum museum mein chalen

wahin baaten karenge

guzre waqton ki baaten

aane wale daur ki baaten

wahan KHamoshi hogi

ki bhiD to bazaron mein chali gai hogi

is haul-nak sannaTe wali jagah se kisi ko kya dilchaspi hai

us ke siwa jo chizon ke raaz jaanna chahta hai

tum mere sath aao

dekho ye museum ye taj-mahal ye jama masjid

ye waishaali

ye ashok ka agam kuan

ye budh ka mujassama

aur ye aurangzeb ki bujhti hui talwar

aur ye wo jahaz

jis se angrez bangal mein utre the

aur ye ek insan ke qadmon ka nishan

kitna haqir

kitna chhoTa

aur aur ye kahan kho gaya hai

kahin aur gaya hoga

in qadmon ne kisi aur safar ka rasta hamwar kiya hoga