mujhe malum tha aaKHir

mujhe ma.alūm thā āḳhir

kisī din merā dil betāb ho kar

tum se iz.hār-e-mohabbat par mujhe majbūr kar degā

aur is par phir tumhārī samt se is tarah kā radd-e-amal hogā

ki jis se merī ġhair ābād āñkhoñ ko

tumhāre avvalīñ dīdār ne jo ḳhūbsūrat ḳhvāb baḳhshā thā

vo chaknā-chūr ho kar ḳhaak meñ mil jā.egā yak-dam

mire ehsās kī murda zamīnoñ meñ

tumhārī muskurāhaT se

khile the phuul jo kaif-o-masarrat ke

vo ik pal meñ bikhar jā.eñge sab ke sab

mire tārīk dil meñ aarzū ke jin charāġhoñ se

zarā sī jagmagāhaT thī

vo ik lamhe meñ bujh jā.eñge sab ke sab

faqat is vajah se jānāñ

maiñ tum se baat karne meñ

hamesha hichkichātā thā

mujhe malum tha aaKHir

kisi din mera dil betab ho kar

tum se izhaar-e-mohabbat par mujhe majbur kar dega

aur is par phir tumhaari samt se is tarah ka radd-e-amal hoga

ki jis se meri ghair aabaad aankhon ko

tumhaare awwalin didar ne jo KHubsurat KHwab baKHsha tha

wo chakna-chur ho kar KHak mein mil jaega yak-dam

mere ehsas ki murda zaminon mein

tumhaari muskurahaT se

khile the phul jo kaif-o-masarrat ke

wo ek pal mein bikhar jaenge sab ke sab

mere tarik dil mein aarzu ke jin charaghon se

zara si jagmagahaT thi

wo ek lamhe mein bujh jaenge sab ke sab

faqat is wajah se jaanan

main tum se baat karne mein

hamesha hichkichata tha