mujhe mat is tarah dekho

mujhe mat is tarah dekho

ki jaise koī dīmak se aTī lakḌī ko taktā hai

kisī sunsān kamre ke dar-o-dīvār par likkhī huī tanhā.ī

paḌhtā hai

khañDar se tār-e-ankabūt kā rishta samajhne ke liye

ḳhud se ulajhtā hai

mujhe mat is tarah ro.o

achānak maut par jis tarah rote haiñ azīzoñ ko

falak par TūTte tāroñ ko jaise chāñd rotā hai

samundar ḳhālī siipī ke liye jaise taḌaptā hai

vo raste

jo ki katrā kar guzar jaate haiñ manzil se

vo sahrā jin kī vus.at par gulistāñ naaz kartā hai

vo sapne jo ki sharminda na hoñ tā۔bīr ke hāthoñ

unheñ royā nahīñ karte

mujhe mat is tarah dekho

ki jaise koi dimak se aTi lakDi ko takta hai

kisi sunsan kamre ke dar-o-diwar par likkhi hui tanhai

paDhta hai

khanDar se tar-e-ankabut ka rishta samajhne ke liye

KHud se ulajhta hai

mujhe mat is tarah roo

achanak maut par jis tarah rote hain azizon ko

falak par TuTte taron ko jaise chand rota hai

samundar KHali sipi ke liye jaise taDapta hai

wo raste

jo ki katra kar guzar jate hain manzil se

wo sahra jin ki wusat par gulistan naz karta hai

wo sapne jo ki sharminda na hon ta۔bir ke hathon

unhen roya nahin karte