مجھے مت اس طرح دیکھو

مجھے مت اس طرح دیکھو

کہ جیسے کوئی دیمک سے اٹی لکڑی کو تکتا ہے

کسی سنسان کمرے کے در و دیوار پر لکھی ہوئی تنہائی

پڑھتا ہے

کھنڈر سے تار عنکبوت کا رشتہ سمجھنے کے لیے

خود سے الجھتا ہے

مجھے مت اس طرح رؤو

اچانک موت پر جس طرح روتے ہیں عزیزوں کو

فلک پر ٹوٹتے تاروں کو جیسے چاند روتا ہے

سمندر خالی سیپی کے لئے جیسے تڑپتا ہے

وہ رستے

جو کہ کترا کر گزر جاتے ہیں منزل سے

وہ صحرا جن کی وسعت پر گلستاں ناز کرتا ہے

وہ سپنے جو کہ شرمندہ نہ ہوں تعبیر کے ہاتھوں

انہیں رویا نہیں کرتے