mujhe mojiz-bayan kar do

mirī atrāf meñ bikhre hue raushan-jabīñ lafzo

mujhe DhūñDo

ajab āshob hai

mere qalam meñ raushnā.ī sūkhtī jaatī hai

aur socheñ na.ī ashkāl meñ Dhalne se qāsir haiñ

jo sochūñ likh nahīñ paatā

jo likkhūñ vo cliche hai

muravvaj isti.āroñ aur tashbīhoñ kī utran se

mirī nazmoñ ke pairāhan nahīñ bante

ta.affun se bhare pairāya-e-iz.hār se

iblāġh kā siina nahīñ khultā

maiñ likhne baiThtā huuñ

to mire hāthoñ kī larzish saath hotī hai

agar kuchh bolnā chāhūñ

to luknat rok letī hai

kisī vijdān kī sūrat

kisī ilhām kī sūrat

dar-e-ib.hām ko kholo

mire afkār kā kashkol

apnī jagmagātī raushnī se is tarah bhar do

ki mere zehn ke āñgan meñ

puure chāñd kī raunaq utar aa.e

jo ab tak mā-varā-e-saut hai

us ko ayaañ kar do

mujhe mojiz-bayāñ kar do

meri atraf mein bikhre hue raushan-jabin lafzo

mujhe DhunDo

ajab aashob hai

mere qalam mein raushnai sukhti jati hai

aur sochen nai ashkal mein Dhalne se qasir hain

jo sochun likh nahin pata

jo likkhun wo cliche hai

murawwaj istiaron aur tashbihon ki utran se

meri nazmon ke pairahan nahin bante

taffun se bhare pairaya-e-izhaar se

iblagh ka sina nahin khulta

main likhne baiThta hun

to mere hathon ki larzish sath hoti hai

agar kuchh bolna chahun

to luknat rok leti hai

kisi wijdan ki surat

kisi ilham ki surat

dar-e-ibham ko kholo

mere afkar ka kashkol

apni jagmagati raushni se is tarah bhar do

ki mere zehn ke aangan mein

pure chand ki raunaq utar aae

jo ab tak ma-wara-e-saut hai

us ko ayan kar do

mujhe mojiz-bayan kar do