mujhe tanha hi rahne do

mujhe tanhā hī rahne do

mujhe tanhā hī rahne do

maiñ ab tanhā.ī meñ āsūda rahtā huuñ

mujhe ab mahfiloñ ke shor se vahshat sī hotī hai

mujhe ab apnī ḳhālī jhoñpḌī kī ḳhāmushī meñ chain paḌtā hai

yahāñ koī bhī merī aur mere dil kī bātoñ meñ ḳhalal paidā nahīñ kartā

yahāñ maiñ jazb kī hālat meñ ghanToñ khoyā rahtā huuñ

magar koī mirā ThaTThā nahīñ kartā

maiñ is māhaul meñ apnī razā se jiitā martā huuñ

yahāñ jo kaam bhī karnā ho maiñ jī-bhar ke kartā huuñ

kabhī tā-der hañstā huuñ

kabhī tā-der rotā huuñ

yahāñ merī hañsī se yā mirī āñkhoñ ke nam se koī afsāna nahīñ bantā

yahāñ maiñ hāsidoñ kī bad-nazar

aur dushmanoñ ke makr se mahfūz rahtā huuñ

yahāñ aġhyār ke dushnām aur ahbāb ke ta.anoñ kā mujh ko Dar nahīñ hotā

so mere dosto tum se guzārish hai

mujhe tanhā.ī meñ ābād rahne do

agar tum mahfil-ārā.ī se ḳhush ho

ḳhush raho

lekin

mujhe bhī shaad rahne do

mujhe tanhā hī rahne do

mujhe tanhā hī rahne do

mujhe tanha hi rahne do

mujhe tanha hi rahne do

main ab tanhai mein aasuda rahta hun

mujhe ab mahfilon ke shor se wahshat si hoti hai

mujhe ab apni KHali jhonpDi ki KHamushi mein chain paDta hai

yahan koi bhi meri aur mere dil ki baaton mein KHalal paida nahin karta

yahan main jazb ki haalat mein ghanTon khoya rahta hun

magar koi mera ThaTTha nahin karta

main is mahaul mein apni raza se jita marta hun

yahan jo kaam bhi karna ho main ji-bhar ke karta hun

kabhi ta-der hansta hun

kabhi ta-der rota hun

yahan meri hansi se ya meri aankhon ke nam se koi afsana nahin banta

yahan main hasidon ki bad-nazar

aur dushmanon ke makr se mahfuz rahta hun

yahan aghyar ke dushnam aur ahbab ke tanon ka mujh ko Dar nahin hota

so mere dosto tum se guzarish hai

mujhe tanhai mein aabaad rahne do

agar tum mahfil-arai se KHush ho

KHush raho

lekin

mujhe bhi shad rahne do

mujhe tanha hi rahne do

mujhe tanha hi rahne do