mujrim

yahī rasta mirī manzil kī taraf jaatā hai

jis ke fōtpath faqīroñ se aTe rahte haiñ

ḳhasta kapḌoñ meñ ye lipTe hue mariyal Dhāñche

ye bhikārī ki jinheñ dekh ke ghin aatī hai

haDDiyāñ jism kī niklī huī pichke hue gaal

maile sar meñ jueñ, a.azā se Tapaktā huā koḌh

ruuh bīmār, badan sust, nigāheñ pāmāl

haath phailā.e paḌe rahte haiñ rogī insān

chand bevāoñ ke madqūq se piile chehre

kuchh havas-kār nigāhoñ meñ utar jaate haiñ

jin ke aflās-zada jism, Dhalakte siine

chand sikkoñ ke evaz shab ko bikā karte haiñ

shiddat-e-fāqa se rote hue nanhe bachche

ek roTī ke nivāle se bahal jaate haiñ

yā sar-e-shām hī so jaate haiñ bhūke pyāse

maañ kī sūkhī huī chhātī ko dabā kar muñh meñ

chand bad-zeb se shohrat-zada insāñ aksar

apnī daulat o saḳhāvat kī numā.ish ke liye

yā kabhī rahm ke jazbe se harārat pā kar

chaar chhe paise unheñ baḳhsh diyā karte haiñ

kyā faqat rahm kī haqdār haiñ nañgī rūheñ?

kyuuñ ye insānoñ pe insān taras khāte haiñ?

kyuuñ inheñ dekh ke ehsās-e-tahī-dastī hai

aksar auqāt maiñ katrā ke nikal jaatā huuñ?

yahī rasta mirī manzil kī taraf jaatā hai

yahi rasta meri manzil ki taraf jata hai

jis ke footpath faqiron se aTe rahte hain

KHasta kapDon mein ye lipTe hue mariyal Dhanche

ye bhikari ki jinhen dekh ke ghin aati hai

haDDiyan jism ki nikli hui pichke hue gal

maile sar mein juen, aaza se Tapakta hua koDh

ruh bimar, badan sust, nigahen pamal

hath phailae paDe rahte hain rogi insan

chand bewaon ke madquq se pile chehre

kuchh hawas-kar nigahon mein utar jate hain

jin ke aflas-zada jism, Dhalakte sine

chand sikkon ke ewaz shab ko bika karte hain

shiddat-e-faqa se rote hue nanhe bachche

ek roTi ke niwale se bahal jate hain

ya sar-e-sham hi so jate hain bhuke pyase

man ki sukhi hui chhati ko daba kar munh mein

chand bad-zeb se shohrat-zada insan aksar

apni daulat o saKHawat ki numaish ke liye

ya kabhi rahm ke jazbe se hararat pa kar

chaar chhe paise unhen baKHsh diya karte hain

kya faqat rahm ki haqdar hain nangi ruhen?

kyun ye insanon pe insan taras khate hain?

kyun inhen dekh ke ehsas-e-tahi-dasti hai

aksar auqat main katra ke nikal jata hun?

yahi rasta meri manzil ki taraf jata hai