mukashafa-2

ye kis kī nidā māvarā-e-nidā aa rahī hai

ye ro.e ma.ashiyat hai yā ġhaib kā koī nūrānī haalā

maut kī aamad aamad hai

maut maktab-e-ilm-e-adam se nikal ke

jism ḳhāk-o-ḳhāshāk se jaan nikāltī hai

phir apnī bartarī surḳh-ravī liye

zamīñ-tā-zamīñ aur āsmāñ-tā-āsmāñ phirtī hai

maut ek kartab-bāz hai

yā tamām kartaboñ kī mojid hai

us ne nar aur maada ko ījād kiyā

aur donoñ ko ham-badan kiyā

phir inzāl kī mausīqī meñ mausīqī meñ us kā gum honā hī to azal-o-abad hai

kabhī na zāhir hone vaalī zamīn kī fazā aur us kā āsmān to

parinde ke bātin meñ hotā hai

varna jism se jaan nikalte hue kis ne dekhā hai

kis ne dekhā hai ek dūsre meñ sote-jāgte peḌ-paudoñ ko

hashrāt ko jamādāt ko

niiñd to kisī gum-shuda jazīre kā naam hai

aur bedārī to āñkhoñ ko dhokā dene vaalī dhund hai

aur is dhund meñ an-ginat sadiyāñ biit ga.ī

phir na jazīra hī milā na sadiyāñ mustaqbil huiiñ

ye kis ki nida mawara-e-nida aa rahi hai

ye roe mashiyat hai ya ghaib ka koi nurani haala

maut ki aamad aamad hai

maut maktab-e-ilm-e-adam se nikal ke

jism KHak-o-KHashak se jaan nikalti hai

phir apni bartari surKH-rawi liye

zamin-ta-zamin aur aasman-ta-asman phirti hai

maut ek kartab-baz hai

ya tamam kartabon ki mojid hai

us ne nar aur mada ko ijad kiya

aur donon ko ham-badan kiya

phir inzal ki mausiqi mein mausiqi mein us ka gum hona hi to azal-o-abad hai

kabhi na zahir hone wali zamin ki faza aur us ka aasman to

parinde ke baatin mein hota hai

warna jism se jaan nikalte hue kis ne dekha hai

kis ne dekha hai ek dusre mein sote-jagte peD-paudon ko

hashraat ko jamadat ko

nind to kisi gum-shuda jazire ka nam hai

aur bedari to aankhon ko dhoka dene wali dhund hai

aur is dhund mein an-ginat sadiyan bit gai

phir na jazira hi mila na sadiyan mustaqbil huin