muKHatibat-e-ashiq

chāñd sī sūrat jo dekhī

jaan ke laale paḌe

zulf ruḳh par yuuñ thī bikhrī

man pe joñ kaale paḌe

kis ġhazab kī sāda-lauhī

qahr vo tarz-e-ḳhirām

mast āñkheñ do chhalakte mai ke paimāne mudām

gaal donoñ gul-ba-dāman

sarv sā qad lā-javāb

lahlahātā thā jo joban

Dagmagātā thā shabāb

haa.e tīkhī tīkhī chitvan

aah pyārā pyārā naam

kaun jaa.e kis ko bhejūñ tū sabā le jā payām

kah ye us se ai dil-ārā

ab nahīñ hai tāb-e-zabt

hai jo tujh par marne vaalā

ho chalā hai us ko ḳhabt

kyā bigaḌ jā.egā terā

rahm se tū le jo kaam

tū hai apnā aap mālik vo magar terā ġhulām

ashk haiñ din-rāt jaarī

surḳh jaise jū-e-ḳhūñ

gar yahī hālat rahegī

āḳhirash hogā junūñ

aah ik aalam hai taarī

kaam hotā hai tamām

chal sitamgar le ḳhabar ab ziist hai tujh bin harām

chand si surat jo dekhi

jaan ke lale paDe

zulf ruKH par yun thi bikhri

man pe jon kale paDe

kis ghazab ki sada-lauhi

qahr wo tarz-e-KHiram

mast aankhen do chhalakte mai ke paimane mudam

gal donon gul-ba-daman

sarw sa qad la-jawab

lahlahata tha jo joban

Dagmagata tha shabab

hae tikhi tikhi chitwan

aah pyara pyara nam

kaun jae kis ko bhejun tu saba le ja payam

kah ye us se ai dil-ara

ab nahin hai tab-e-zabt

hai jo tujh par marne wala

ho chala hai us ko KHabt

kya bigaD jaega tera

rahm se tu le jo kaam

tu hai apna aap malik wo magar tera ghulam

ashk hain din-raat jari

surKH jaise ju-e-KHun

gar yahi haalat rahegi

aaKHirash hoga junun

aah ek aalam hai tari

kaam hota hai tamam

chal sitamgar le KHabar ab zist hai tujh bin haram