مخاطبت عاشق

چاند سی صورت جو دیکھی

جان کے لالے پڑے

زلف رخ پر یوں تھی بکھری

من پہ جوں کالے پڑے

کس غضب کی سادہ لوحی

قہر وہ طرز خرام

مست آنکھیں دو چھلکتے مے کے پیمانے مدام

گال دونوں گل بدامن

سرو سا قد لا جواب

لہلہاتا تھا جو جوبن

ڈگمگاتا تھا شباب

ہائے تیکھی تیکھی چتون

آہ پیارا پیارا نام

کون جائے کس کو بھیجوں تو صبا لے جا پیام

کہہ یہ اس سے اے دل آرا

اب نہیں ہے تاب ضبط

ہے جو تجھ پر مرنے والا

ہو چلا ہے اس کو خبط

کیا بگڑ جائے گا تیرا

رحم سے تو لے جو کام

تو ہے اپنا آپ مالک وہ مگر تیرا غلام

اشک ہیں دن رات جاری

سرخ جیسے جوئے خوں

گر یہی حالت رہے گی

آخرش ہوگا جنوں

آہ اک عالم ہے طاری

کام ہوتا ہے تمام

چل ستم گر لے خبر اب زیست ہے تجھ بن حرام