mukti

garajtī

TuuT kar girtī ghaTā.eñ

āsmānoñ se musalsal sañg-bārī

nauhagar dīvār-o-dar

zaḳhmī chhateñ

shīshoñ pe paanī qatra qatra phailtā baḌhtā

phisaltī TūTtī nannhī lakīreñ

jo thake hāthoñ kī rekhāoñ kī sūrat

nit-nirāle ruup bhartī haiñ

ḳhalā dil kā zarā sī der bhī ḳhālī nahīñ hotā

use jo bhī mayassar ho vo bhar letā hai siine meñ

tamannā phir tamannā hai

vo chāhe maut hī kī ho

vahī dukhtī ragoñ meñ ḳhuun ke tūfāñ thapeḌe

phir vahī shīshoñ pe baḌhte phailte jaale

paroñ kī āḳhirī be-jān sī

ik phaḌphaḌāhaT ke sivā kyā haiñ

ye fariyād-o-fuġhāñ naale

mujhe ma.alūm hai jab vaqt bahtā hai

to phir maujoñ meñ kab vo farq kartā hai

vo chāhe pur-sukūñ hoñ

yā kisī sāhil se apne sar ko Takrā.eñ

sisaktī reñgtī guzrīñ

taḌap kar ret meñ ḳhud jazb ho jaa.eñ

vo chāheñ kuchh kareñ

kyā farq paḌtā hai

phisaltī TūTtī nannhī lakīreñ

darāzoñ se nikal kar farsh tak aane lagīñ lekin

vo kitnī duur tak yuuñ reñg saktī haiñ

dilāse reshmī paiġhām ḳhvāb-ālūda tamannā.eñ

bhalā is sañg-bārī kī sipar kaise baneñgī

hazāroñ kā.enāteñ TūTtī bantī haiñ har lahza

tanāvar peḌ girte haiñ

chaTāneñ reza reza ho ke nas nas meñ khaTaktī haiñ

darīche pai-ba-pai barsāt ke hamloñ se andhe haiñ

fazā gūñgī hai bahrī hai

chalo ye zindagī aur maut donoñ aaj se mere nahīñ haiñ

mirī āñkhoñ kī bīnā.ī

zabāñ kī tāb-e-goyā.ī

samā.at lams sab kuchh aaj se mere nahīñ haiñ

chalo maiñ bhī tamāshā.ī huuñ ḳhud apne jahannam kā

mirī duniyā tamāshā hai

maiñ apne sāmne ḳhud ko taḌaptā sar paTaktā dekh saktā huuñ

aur aisā mutma.in huuñ aaj jaise ye janam mujh ko

abhī kuchh der pahle hī milā hai

aur kisī an-jānī duniyā se

baraste bādaloñ ke saath aayā huuñ

garajti

TuT kar girti ghaTaen

aasmanon se musalsal sang-bari

nauhagar diwar-o-dar

zaKHmi chhaten

shishon pe pani qatra qatra phailta baDhta

phisalti TuTti nannhi lakiren

jo thake hathon ki rekhaon ki surat

nit-nirale rup bharti hain

KHala dil ka zara si der bhi KHali nahin hota

use jo bhi mayassar ho wo bhar leta hai sine mein

tamanna phir tamanna hai

wo chahe maut hi ki ho

wahi dukhti ragon mein KHun ke tufan thapeDe

phir wahi shishon pe baDhte phailte jale

paron ki aaKHiri be-jaan si

ek phaDphaDahaT ke siwa kya hain

ye fariyaad-o-fughan nale

mujhe malum hai jab waqt bahta hai

to phir maujon mein kab wo farq karta hai

wo chahe pur-sukun hon

ya kisi sahil se apne sar ko Takraen

sisakti rengti guzrin

taDap kar ret mein KHud jazb ho jaen

wo chahen kuchh karen

kya farq paDta hai

phisalti TuTti nannhi lakiren

daraazon se nikal kar farsh tak aane lagin lekin

wo kitni dur tak yun reng sakti hain

dilase reshmi paigham KHwab-aluda tamannaen

bhala is sang-bari ki sipar kaise banengi

hazaron kaenaten TuTti banti hain har lahza

tanawar peD girte hain

chaTanen reza reza ho ke nas nas mein khaTakti hain

dariche pai-ba-pai barsat ke hamlon se andhe hain

faza gungi hai bahri hai

chalo ye zindagi aur maut donon aaj se mere nahin hain

meri aankhon ki binai

zaban ki tab-e-goyai

samaat lams sab kuchh aaj se mere nahin hain

chalo main bhi tamashai hun KHud apne jahannam ka

meri duniya tamasha hai

main apne samne KHud ko taDapta sar paTakta dekh sakta hun

aur aisa mutmain hun aaj jaise ye janam mujh ko

abhi kuchh der pahle hi mila hai

aur kisi an-jaani duniya se

baraste baadalon ke sath aaya hun