mulaqat

baad ek muddat ke

ajnabī se chehroñ meñ

ḳhvāb ḳhvāb āñkhoñ meñ

dard kī samā.at meñ

be-dilī kī saa.at meñ

ek ajnabī sūrat

āshnā nazar aa.ī

ḳhvāb ḳhvāb āñkhoñ meñ

raushnī sī lahrā.ī

dard kī samā.at ne

dil kī kuchh ḳhabar paa.ī

us ne garm-joshī se haath bhī milāyā thā

baad ek muddat ke maiñ bhī muskurāyā thā

us ne mere shāne ko chuum hī liyā āḳhir

maiñ bhī ek lamhe ko jhuum hī liyā āḳhir

aao ik zarā sī der lawn hī meñ Tahleñge

jo bhī kahnā sunñā hai ho sakā to kah leñge

shāyad ek muddat kī bekalī bhī kal paa.e

aur hamārī qismat se chāñd bhī nikal aa.e

ik udaas sannāTā aur shab zamistāñ kī

be-suḳhan kahī ham ne baat dard-e-pinhāñ kī

chāñd ne bhī chupke se kuchh kahā to thā ham se

mere uljhe bāloñ se us kī zulf-e-barham se

vo thī chāñd thā maiñ thā

yuuñ to kitne chehre the

apnī zaat ke andar

ham sabhī akele the

sard sard ik chehra

zard zard ik chehra

gard gard ik chehra

dard-yāfta chehre hijr-yāfta chehre

jaise rū-ba-rū apne ā.īne se rakkhe the

baad ek muddat ke

ajnabi se chehron mein

KHwab KHwab aankhon mein

dard ki samaat mein

be-dili ki saat mein

ek ajnabi surat

aashna nazar aai

KHwab KHwab aankhon mein

raushni si lahrai

dard ki samaat ne

dil ki kuchh KHabar pai

us ne garm-joshi se hath bhi milaya tha

baad ek muddat ke main bhi muskuraya tha

us ne mere shane ko chum hi liya aaKHir

main bhi ek lamhe ko jhum hi liya aaKHir

aao ek zara si der lawn hi mein Tahlenge

jo bhi kahna sunna hai ho saka to kah lenge

shayad ek muddat ki bekali bhi kal pae

aur hamari qismat se chand bhi nikal aae

ek udas sannaTa aur shab zamistan ki

be-suKHan kahi hum ne baat dard-e-pinhan ki

chand ne bhi chupke se kuchh kaha to tha hum se

mere uljhe baalon se us ki zulf-e-barham se

wo thi chand tha main tha

yun to kitne chehre the

apni zat ke andar

hum sabhi akele the

sard sard ek chehra

zard zard ek chehra

gard gard ek chehra

dard-yafta chehre hijr-yafta chehre

jaise ru-ba-ru apne aaine se rakkhe the