munafiq shair

maiñ munāfiq huuñ har ik kā dost ban jaatā huuñ maiñ

dost ban kar dostoñ meñ phuuT Dalvātā huuñ maiñ

intihā kī chiḌ hai mujh ko do diloñ ke qurb se

dekhtā huuñ jab ye fauran jaal phailātā huuñ maiñ

maiñ burā.ī raam kī kartā huuñ jā kar shaam se

shaam ne jo kuchh kahā vo raam tak laatā huuñ maiñ

piiTh pīchhe sab ko detā huuñ muġhallaz gāliyāñ

sāmne lekin adab se sar ke bal jaatā huuñ maiñ

halqa-e-ahl-e-suḳhan meñ jo mirī tauqīr hai

chhin na jaa.e har na.e shā.ir se ghabrātā huuñ maiñ

mujh ko apnī shā.erī par kis tarah ho e'timād

ḳhud to kam kahtā huuñ auroñ se kahalvātā huuñ maiñ

daad dene ke liye rakhtā huuñ kuchh ahbāb saath

sher un ke vāste bhī maañg kar laatā huuñ maiñ

bazm meñ paḌhtā huuñ maiñ nathune phulā kar chīḳh kar

aur is se peshtar taqrīr farmātā huuñ maiñ

ye samajhtā huuñ ki koī sher ḳhud kahtā nahīñ

ye ḳhabar har ek ke baare meñ phailātā huuñ maiñ

aur koī sher kah letā hai achchhā bhī agar

kal kā lauñDā kah ke ḳhātir meñ nahīñ laatā huuñ maiñ

ḳhud to nā-mauzūñ bhī kah letā huuñ mauzūñ bhī magar

dūsre ke sher par tanqīd farmātā huuñ maiñ

shā.erī se vāsta mujh ko na urdu se ġharaz

sirf shohrat ke liye un se ulajh jaatā huuñ maiñ

kuchh buzurgoñ se mujhe bhī qurb hāsil thā kabhī

naam ho un se mirā yuuñ un ke gun gaatā huuñ maiñ

zikr kartā huuñ purānī sohbatoñ kā baar baar

aur daur-e-hāl ko maazī se Thukrātā huuñ maiñ

bāvajūd is ke agar hotī nahīñ shohrat nasīb

gāliyāñ detā huuñ sab ko baukhlā jaatā huuñ maiñ

jis se maiñ vāqif huuñ vo shohrat meñ aage baḌh gayā

dekh kar us ko bahut kuḌhtā huuñ bal khātā huuñ maiñ

jāntā hī kaun thā mash.hūr maiñ ne kar diyā

bas yahī kah kah ke apne dil ko samajhtā huuñ maiñ

ilm-o-fan kī chand bāteñ jo mujhe ma.alūm haiñ

daad paane ke liye har baar dohrātā huuñ maiñ

daad denī ho to yuuñ detā huuñ ik ik lafz par

lafz puurā bhī nahīñ hotā phaḌak jaatā huuñ maiñ

kuchh na the ash.ār muñh dekhe kī dī thī maiñ ne daad

vaqt-e-ġhībat daad kī tardīd farmātā huuñ maiñ

jab kisī bazm-e-suḳhan meñ sher paḌhtā hai koī

ik taraf baiThā huā tashīh farmātā huuñ maiñ

saath vāloñ par yuuñ kartā huuñ fazīlat āshkār

ho na ho har sher meñ kuchh aib ginvātā huuñ maiñ

yā kabhī phir daad detā huuñ ba-āvāz-e-duhal

saath vāloñ kī taraf phir aañkh michkātā huuñ maiñ

sāmne jab tak rahūñ maiñ huuñ ġhulāmoñ kā ġhulām

āsmāñ se varna taare toḌ kar laatā huuñ maiñ

jo nahīñ laate haiñ ḳhātir meñ ḳhushāmad ko mirī

vo jhiḌak dete haiñ mujh ko un se ghabrātā huuñ maiñ

yā samajh jaate haiñ jo in mere hathkandoñ kā raaz

sāmne aate hue un ke bhī katrātā huuñ maiñ

kamtarī kā hai 'shifā' ehsās in sab kā sabab

dushmanī auroñ ke dil meñ to nahīñ paatā huuñ maiñ

main munafiq hun har ek ka dost ban jata hun main

dost ban kar doston mein phuT Dalwata hun main

intiha ki chiD hai mujh ko do dilon ke qurb se

dekhta hun jab ye fauran jal phailata hun main

main burai ram ki karta hun ja kar sham se

sham ne jo kuchh kaha wo ram tak lata hun main

piTh pichhe sab ko deta hun mughallaz galiyan

samne lekin adab se sar ke bal jata hun main

halqa-e-ahl-e-suKHan mein jo meri tauqir hai

chhin na jae har nae shair se ghabraata hun main

mujh ko apni shaeri par kis tarah ho e'timad

KHud to kam kahta hun auron se kahalwata hun main

dad dene ke liye rakhta hun kuchh ahbab sath

sher un ke waste bhi mang kar lata hun main

bazm mein paDhta hun main nathune phula kar chiKH kar

aur is se peshtar taqrir farmata hun main

ye samajhta hun ki koi sher KHud kahta nahin

ye KHabar har ek ke bare mein phailata hun main

aur koi sher kah leta hai achchha bhi agar

kal ka launDa kah ke KHatir mein nahin lata hun main

KHud to na-mauzun bhi kah leta hun mauzun bhi magar

dusre ke sher par tanqid farmata hun main

shaeri se wasta mujh ko na urdu se gharaz

sirf shohrat ke liye un se ulajh jata hun main

kuchh buzurgon se mujhe bhi qurb hasil tha kabhi

nam ho un se mera yun un ke gun gata hun main

zikr karta hun purani sohbaton ka bar bar

aur daur-e-haal ko mazi se Thukraata hun main

bawajud is ke agar hoti nahin shohrat nasib

galiyan deta hun sab ko baukhla jata hun main

jis se main waqif hun wo shohrat mein aage baDh gaya

dekh kar us ko bahut kuDhta hun bal khata hun main

jaanta hi kaun tha mashhur main ne kar diya

bas yahi kah kah ke apne dil ko samajhta hun main

ilm-o-fan ki chand baaten jo mujhe malum hain

dad pane ke liye har bar dohraata hun main

dad deni ho to yun deta hun ek ek lafz par

lafz pura bhi nahin hota phaDak jata hun main

kuchh na the ashaar munh dekhe ki di thi main ne dad

waqt-e-ghibat dad ki tardid farmata hun main

jab kisi bazm-e-suKHan mein sher paDhta hai koi

ek taraf baiTha hua tashih farmata hun main

sath walon par yun karta hun fazilat aashkar

ho na ho har sher mein kuchh aib ginwata hun main

ya kabhi phir dad deta hun ba-awaz-e-duhal

sath walon ki taraf phir aankh michkata hun main

samne jab tak rahun main hun ghulamon ka ghulam

aasman se warna tare toD kar lata hun main

jo nahin late hain KHatir mein KHushamad ko meri

wo jhiDak dete hain mujh ko un se ghabraata hun main

ya samajh jate hain jo in mere hathkandon ka raaz

samne aate hue un ke bhi katraata hun main

kamtari ka hai 'shifa' ehsas in sab ka sabab

dushmani auron ke dil mein to nahin pata hun main