منافق شاعر

میں منافق ہوں ہر اک کا دوست بن جاتا ہوں میں

دوست بن کر دوستوں میں پھوٹ ڈلواتا ہوں میں

انتہا کی چڑ ہے مجھ کو دو دلوں کے قرب سے

دیکھتا ہوں جب یہ فوراً جال پھیلاتا ہوں میں

میں برائی رام کی کرتا ہوں جا کر شام سے

شام نے جو کچھ کہا وہ رام تک لاتا ہوں میں

پیٹھ پیچھے سب کو دیتا ہوں مغلظ گالیاں

سامنے لیکن ادب سے سر کے بل جاتا ہوں میں

حلقۂ اہل سخن میں جو مری توقیر ہے

چھن نہ جائے ہر نئے شاعر سے گھبراتا ہوں میں

مجھ کو اپنی شاعری پر کس طرح ہو اعتماد

خود تو کم کہتا ہوں اوروں سے کہلواتا ہوں میں

داد دینے کے لئے رکھتا ہوں کچھ احباب ساتھ

شعر ان کے واسطے بھی مانگ کر لاتا ہوں میں

بزم میں پڑھتا ہوں میں نتھنے پھلا کر چیخ کر

اور اس سے پیشتر تقریر فرماتا ہوں میں

یہ سمجھتا ہوں کہ کوئی شعر خود کہتا نہیں

یہ خبر ہر ایک کے بارے میں پھیلاتا ہوں میں

اور کوئی شعر کہہ لیتا ہے اچھا بھی اگر

کل کا لونڈا کہہ کے خاطر میں نہیں لاتا ہوں میں

خود تو نا موزوں بھی کہہ لیتا ہوں موزوں بھی مگر

دوسرے کے شعر پر تنقید فرماتا ہوں میں

شاعری سے واسطہ مجھ کو نہ اردو سے غرض

صرف شہرت کے لئے ان سے الجھ جاتا ہوں میں

کچھ بزرگوں سے مجھے بھی قرب حاصل تھا کبھی

نام ہو ان سے مرا یوں ان کے گن گاتا ہوں میں

ذکر کرتا ہوں پرانی صحبتوں کا بار بار

اور دور حال کو ماضی سے ٹھکراتا ہوں میں

باوجود اس کے اگر ہوتی نہیں شہرت نصیب

گالیاں دیتا ہوں سب کو بوکھلا جاتا ہوں میں

جس سے میں واقف ہوں وہ شہرت میں آگے بڑھ گیا

دیکھ کر اس کو بہت کڑھتا ہوں بل کھاتا ہوں میں

جانتا ہی کون تھا مشہور میں نے کر دیا

بس یہی کہہ کہہ کے اپنے دل کو سمجھتا ہوں میں

علم و فن کی چند باتیں جو مجھے معلوم ہیں

داد پانے کے لئے ہر بار دہراتا ہوں میں

داد دینی ہو تو یوں دیتا ہوں اک اک لفظ پر

لفظ پورا بھی نہیں ہوتا پھڑک جاتا ہوں میں

کچھ نہ تھے اشعار منہ دیکھے کی دی تھی میں نے داد

وقت غیبت داد کی تردید فرماتا ہوں میں

جب کسی بزم سخن میں شعر پڑھتا ہے کوئی

اک طرف بیٹھا ہوا تصحیح فرماتا ہوں میں

ساتھ والوں پر یوں کرتا ہوں فضیلت آشکار

ہو نہ ہو ہر شعر میں کچھ عیب گنواتا ہوں میں

یا کبھی پھر داد دیتا ہوں بہ آواز دہل

ساتھ والوں کی طرف پھر آنکھ مچکاتا ہوں میں

سامنے جب تک رہوں میں ہوں غلاموں کا غلام

آسماں سے ورنہ تارے توڑ کر لاتا ہوں میں

جو نہیں لاتے ہیں خاطر میں خوشامد کو مری

وہ جھڑک دیتے ہیں مجھ کو ان سے گھبراتا ہوں میں

یا سمجھ جاتے ہیں جو ان میرے ہتھکنڈوں کا راز

سامنے آتے ہوئے ان کے بھی کتراتا ہوں میں

کمتری کا ہے شفاؔ احساس ان سب کا سبب

دشمنی اوروں کے دل میں تو نہیں پاتا ہوں میں