munjamid aankhen

khulī āñkhoñ ko koī band kar do

khulī āñkhoñ kī vīrānī se haul aatā hai

koī in khulī āñkhoñ ko baḌh kar band kar do

ye āñkheñ ik anokhī yaḳh-zada duniyā kī

sākit raushnī meñ kho ga.ī haiñ

ab in āñkhoñ meñ

koī rañg paidā hai na koī rañg pinhāñ hai

na koī aks-e-gul-ban hai

na koī dāġh-e-hirmāñ hai

na ganj-e-shā.egāñ kī ārzu-e-be-nihāyat hai

na ranj-e-rā.egāñ kā aks-e-larzāñ hai

agar kuchh hai to bas

ik yaḳh-zada nayā kā naqsh-e-jāvedāñ hai

ye āñkheñ

ab shuā-e-ārzū kī har kiran se yuuñ gurezāñ haiñ

ki patthar ban ga.ī haiñ

ye āñkheñ mar ga.ī haiñ

khuli aankhon ko koi band kar do

khuli aankhon ki virani se haul aata hai

koi in khuli aankhon ko baDh kar band kar do

ye aankhen ek anokhi yaKH-zada duniya ki

sakit raushni mein kho gai hain

ab in aankhon mein

koi rang paida hai na koi rang pinhan hai

na koi aks-e-gul-ban hai

na koi dagh-e-hirman hai

na ganj-e-shaegan ki aarzu-e-be-nihayat hai

na ranj-e-raegan ka aks-e-larzan hai

agar kuchh hai to bas

ek yaKH-zada naya ka naqsh-e-jawedan hai

ye aankhen

ab shua-e-arzu ki har kiran se yun gurezan hain

ki patthar ban gai hain

ye aankhen mar gai hain