tashannuj

aaj kis aalam meñ haiñ ahbāb mere

aañkh meñ tāb-o-tab o nam kuchh nahīñ

dil kisī refrigerator meñ rakhe hoñge kahīñ

jism hāzir haiñ yahāñ ġhā.eb dimāġh

muskurāhaT: ik lipstick ḳhanda-peshānī naqāb

ruuh: burqā-posh: āñkheñ be-hijāb!

kis liye mujh ko pareshāñ kar rahe haiñ ḳhvāb mere

niiñd ke zaḳhmī kaf-e-pā se Tapaktā hai ḳhud apnā hī lahū

ḳhvāb meñ phūloñ se aatī hai ḳhud apne ḳhuuñ kī bū

be-amal huuñ (ḳhvāb meñ huuñ) phir bhī jaarī (ek benām-o-nishāñ sii) justujū

darmiyāñ se is zamīñ ko chīrtā jaatā hai chāk-e-irtiqā

maut aa kar khaTkhaTātī rahtī hai dar aañkh kā

kis liye khiñchte chale jaate haiñ ye a.asāb mere

ahd-e-nau ke kis muġhannī kā junūñ

tārsaptak maiñ unheñ kartā huuñ tune

kaun in tāroñ ko itnā kas rahā hai

TuuT jā.eñge to is naġhme se bhī mahrūm ho jā.egā saaz

jis meñ shāmil hai shikast-e-zāt kī āvāz

aaj kis aalam mein hain ahbab mere

aankh mein tab-o-tab o nam kuchh nahin

dil kisi refrigerator mein rakhe honge kahin

jism hazir hain yahan ghaeb dimagh

muskurahaT: ek lipstick KHanda-peshani naqab

ruh: burqa-posh: aankhen be-hijab!

kis liye mujh ko pareshan kar rahe hain KHwab mere

nind ke zaKHmi kaf-e-pa se Tapakta hai KHud apna hi lahu

KHwab mein phulon se aati hai KHud apne KHun ki bu

be-amal hun (KHwab mein hun) phir bhi jari (ek benam-o-nishan si) justuju

darmiyan se is zamin ko chirta jata hai chaak-e-irtiqa

maut aa kar khaTkhaTati rahti hai dar aankh ka

kis liye khinchte chale jate hain ye aasab mere

ahd-e-nau ke kis mughanni ka junun

tarsaptak main unhen karta hun tune

kaun in taron ko itna kas raha hai

TuT jaenge to is naghme se bhi mahrum ho jaega saz

jis mein shamil hai shikast-e-zat ki aawaz