منتخب روزگار ابوالکلام آزادؔ

قدم قدم پہ عقیدت سے سر ہے خم میرا

چلا ہے سوئے رہ معتبر قلم میرا

دل و دماغ کو اونچا بنا دیا جس نے

فیوض علم سے اعلیٰ بنا یا جس نے

بڑے خلوص سے دیتا تھا درس انسانی

ہوئے ہیں جس کی بدولت ضمیر نورانی

وہ جس نے راہ محبت دکھائی تھی ہم کو

وہ جس نے رسم اخوت سکھائی تھی ہم کو

وہ جس نے برتر و بالا خیال بخشا تھا

جو لا زوال ہے ایسا کمال بخشا تھا

وہ ایک فکر جو با اعتبار کرتی ہے

نظر میں کابل صد افتخار کرتی ہے

وہ جس نے زیست سجائی جلائے دل کے چراغ

اسی کے سوز نے بخشی ہمیں متاع دماغ

اسی نے طرز تکلم کی چاشنی دی ہے

اسی نے علم کی خوش رنگ زندگی دی ہے

اسی نے حرف ہدایت سے سرفراز کیا

خدا کا شکر ہمیں آشنائے راز کیا

گلوں سے پیار عنادل سے اس کا یارانہ

سکون و امن کا مرکز تھا اس کا کاشانہ

متاع علم لٹاتی رہی ہے ذات اس کی

بہت دراز تھی زلف نوازشات اس کی

رخ حیات کو بخشی ہے اک جلا اس نے

شعور ذوق نظر کا عطا کیا اس نے

سکون دل کو میسر تھا اس کی قربت سے

ہم اہل ہند کی عظمت ہے اس کی نسبت سے

افق پہ ابھرا جو وہ الہلال کی صورت

جوان ہو کے رہی البلاغ کی فطرت

ہیں تذکرے میں کچھ ایسے نقوش فکر جمیل

غبار خاطر و خطبات کی سجیں قندیل

جو ترجمان سے پھیلی کلام کی خوشبو

سنوارے اس نے ہی پیچیدہ عقل کے گیسو

اسی نے ساز ادب کو صدائے نو بخشی

شکستہ دل کو انوکھی ادائے نو بخشی

دیار‌ گل میں وہ آیا تھا مسکراتا ہوا

ہر ایک خار چمن کو گلے لگاتا ہوا

گلوں کا رنگ صبا کا شعار لایا تھا

وہ اک بہار تھا حسن بہار لایا تھا

نہ اس بہار سے اب تک بھرا تھا دل اپنا

کہ چند لمحوں کو اس سے لگا تھا دل اپنا

قضائے حسن چمن کو چمن سے چھین لیا

شباب جیسے نویلی دلہن سے چھین لیا

بہار ہے نہ وجود بہار باقی ہے

دلوں میں یاد نمود بہار باقی ہے

بزرگ و مخلص و عالی وقار تھا وہ شخص

کہ ایک منتخب روزگار تھا وہ شخص