muntazim

hamāre jaise ajiib logoñ kī ranjishoñ kā

malāl kis ko

zamīn kartī hai bain

aañsū falak bahātā hai chupke chupke

fazā meñ siskī sī tairtī hai

haiñ sar-ba-zānūñ tamām manzar

kahīñ chhinī hai kisī kī guḌiyā

kahīñ phaTī haiñ na.ī kitābeñ

kisī kī shah-rag pe koī jhapTā

kisī kī galiyoñ meñ ḳhuun bikhrā

sunā hai ham ne

ki is shujā.at pe tamġha milegā us ko

baḌī nafāsat se us ne chhāñTe haiñ apne revaḌ

maveshī saare baTe hue haiñ

ye rañg o zaat o nasl un ke bane tavīle

sab apnī ḳhushiyoñ ġhamoñ ko bāñTeñge apnī had meñ

ki bheḌ bakrī se mil na paa.e

na gaa.e bheñsoñ meñ hoñ kuleleñ

sunā hai us ke nizām-e-mulkī pe sab haiñ nāzāñ

use hī baḳhsheñge phir se vo mansab-e-hazārī

hamāre jaise ajiib logoñ kī āñkhoñ meñ

kyuuñ hai itnā paanī

hamare jaise ajib logon ki ranjishon ka

malal kis ko

zamin karti hai bain

aansu falak bahata hai chupke chupke

faza mein siski si tairti hai

hain sar-ba-zanun tamam manzar

kahin chhini hai kisi ki guDiya

kahin phaTi hain nai kitaben

kisi ki shah-rag pe koi jhapTa

kisi ki galiyon mein KHun bikhra

suna hai hum ne

ki is shujaat pe tamgha milega us ko

baDi nafasat se us ne chhanTe hain apne rewaD

maweshi sare baTe hue hain

ye rang o zat o nasl un ke bane tawile

sab apni KHushiyon ghamon ko banTenge apni had mein

ki bheD bakri se mil na pae

na gae bhenson mein hon kulelen

suna hai us ke nizam-e-mulki pe sab hain nazan

use hi baKHshenge phir se wo mansab-e-hazari

hamare jaise ajib logon ki aankhon mein

kyun hai itna pani