murajat

maiñ kitne baras baa'd ghar apne lauTī

mirā ghar vahī thā

purānī masahrī bhī apnī jagah thī

ki sāmān thoḌā bahut juuñ kā tuuñ thā

navādir jo dīvār par the kabhī

vo dīvāreñ bas nangī būchī khaḌī thiiñ

safedī to thī

phir bhī thappaḌ kuchh aise gire the

ki dīvār par naqsh se ban ga.e the

masahrī pe leTī

maiñ dīvār ko tak rahī thī

ki zaḳhmī kaleje pe jaise koī yaad

nāḳhun se apne kharoñche lagā de

har ik shai vahāñ gard se aT rahī thī

purānī masahrī pe bas ek chādar na.ī thī

mujhe vaqt se ḳhauf aaya

magar maiñ ne āñkheñ jo mūñdīñ

to aisā lagā

gayā vaqt phir lauT aaya hai

aur mujh ko bāñhoñ meñ bhar kar

purānī masahrī pe us ne girāyā

mujhe vaqt kī is adā par bahut pyaar aaya

mujhe vaqt kī is adā ne rulāyā

main kitne baras ba'd ghar apne lauTi

mera ghar wahi tha

purani masahri bhi apni jagah thi

ki saman thoDa bahut jun ka tun tha

nawadir jo diwar par the kabhi

wo diwaren bas nangi buchi khaDi thin

safedi to thi

phir bhi thappaD kuchh aise gire the

ki diwar par naqsh se ban gae the

masahri pe leTi

main diwar ko tak rahi thi

ki zaKHmi kaleje pe jaise koi yaad

naKHun se apne kharonche laga de

har ek shai wahan gard se aT rahi thi

purani masahri pe bas ek chadar nai thi

mujhe waqt se KHauf aaya

magar main ne aankhen jo mundin

to aisa laga

gaya waqt phir lauT aaya hai

aur mujh ko banhon mein bhar kar

purani masahri pe us ne giraya

mujhe waqt ki is ada par bahut pyar aaya

mujhe waqt ki is ada ne rulaya