مراجعت

میں کتنے برس بعد گھر اپنے لوٹی

مرا گھر وہی تھا

پرانی مسہری بھی اپنی جگہ تھی

کہ سامان تھوڑا بہت جوں کا توں تھا

نوادر جو دیوار پر تھے کبھی

وہ دیواریں بس ننگی بوچی کھڑی تھیں

سفیدی تو تھی

پھر بھی تھپڑ کچھ ایسے گرے تھے

کہ دیوار پر نقش سے بن گئے تھے

مسہری پہ لیٹی

میں دیوار کو تک رہی تھی

کہ زخمی کلیجے پہ جیسے کوئی یاد

ناخن سے اپنے کھرونچے لگا دے

ہر اک شے وہاں گرد سے اٹ رہی تھی

پرانی مسہری پہ بس ایک چادر نئی تھی

مجھے وقت سے خوف آیا

مگر میں نے آنکھیں جو موندیں

تو ایسا لگا

گیا وقت پھر لوٹ آیا ہے

اور مجھ کو بانہوں میں بھر کر

پرانی مسہری پہ اس نے گرایا

مجھے وقت کی اس ادا پر بہت پیار آیا

مجھے وقت کی اس ادا نے رلایا