murajat

vo chakā-chauñd vo shahr ke jalve

vo tamāshe vo kartab ujāloñ ke

ho rahe mahv ham bas-ki saa.e the

har taraf sho.abde be-karāñ se the

mubtalā jin meñ ham jism-o-jāñ se the

na rahā yaad aa.e kahāñ se the

nazar ik den thī ḳhud nazāroñ kī

zaat apnī ibārat unhīñ se thī

rehn-e-dariyā thī girdāb kī hastī

uns ke rābtoñ ke amiiñ the ham

ik fazā thī jahāñ har kahīñ the ham

rābtoñ ke sivā kuchh nahīñ the ham

khel thā ik charāġh-e-tamannā kā

jis kī lau se thī sab raushnī barpā

vaqt kā tel nazroñ se ojhal thā

ye guzishta bahāroñ ke gul-būTe

chaman-e-ārzū ke jigar-goshe

hameñ ghere khaḌe rāste roke

liye āñkhoñ meñ rañj-o-mehan apne

kiye jā.eñge kab tak jatan apne

hameñ jaane bhī deñ ab vatan apne

wo chaka-chaund wo shahr ke jalwe

wo tamashe wo kartab ujalon ke

ho rahe mahw hum bas-ki sae the

har taraf shoabde be-karan se the

mubtala jin mein hum jism-o-jaan se the

na raha yaad aae kahan se the

nazar ek den thi KHud nazaron ki

zat apni ibarat unhin se thi

rehn-e-dariya thi girdab ki hasti

uns ke rabton ke amin the hum

ek faza thi jahan har kahin the hum

rabton ke siwa kuchh nahin the hum

khel tha ek charagh-e-tamanna ka

jis ki lau se thi sab raushni barpa

waqt ka tel nazron se ojhal tha

ye guzishta bahaaron ke gul-buTe

chaman-e-arzu ke jigar-goshe

hamein ghere khaDe raste roke

liye aankhon mein ranj-o-mehan apne

kiye jaenge kab tak jatan apne

hamein jaane bhi den ab watan apne