murgh-e-marhum

ai mire murġhe mire sarmāya-e-taskīn-e-jāñ

terī furqat meñ hai be-raunaq mirā saarā makāñ

kaun degā raat ke bārah baje uTh kar azaañ

terī furqat meñ ye dil taḌpā jigar ne aah kī

khā ga.ī tujh ko nazar shāyad kisī bad-ḳhvāh kī

tujh ko laayā thā karachi se ki pālūñgā tujhe

mashriqī ādāb ke sāñche meñ Dhālūñgā tujhe

muft-ḳhoroñ kī nigāhoñ se bachā lūñgā tujhe

tujh pe lekin maut ke dil-doz saa.e chhā ga.e

hasrat un ġhunchoñ pe hai jo bin khile murjhā ga.e

tere ġhamze zindagānī bhar na bhūleñge mujhe

phuul sī kalġhī mulā.em par na bhūleñge mujhe

tere andāz-e-hasīñ yaksar na bhūleñge mujhe

chhoḌ kar mujh ko tū dast-e-dāvar-e-mahshar meñ hai

terā Darba tujh se behtar hai ki mere ghar meñ hai

maiñ vabā-e-ām se tujh ko bachātā rah gayā

tujh ko kitne qīmtī sharbat pilātā rah gayā

tujh ko rānī-khet ke Tiike lagātā rah gayā

mere injection tujhe lutf-e-fanā dene lage

jin pe takiya thā vahī patte havā dene lage

terī sūrat jab bhī yaad aa.ī jigar taḌpā ga.ī

terī furqat meñ mire paañv meñ kal moch aa ga.ī

ḳhāmushī sī merī duniyā-e-nazar meñ chhā ga.ī

kar ke bahr-e-ġham meñ merī kashtī-e-dil pāsh-pāsh

bāzī-e-goī ki dāman tar makun hushiyār baash

dāstān-e-murġh ik dard-e-nihāñ sābit huī

ye pareshānī nashāt-e-dushmanāñ sābit huī

dostoñ kī har tasallī rā.egāñ sābit huī

dost ġham-ḳhvārī meñ merī sa.ī farmā.eñge kyā

ek ik murġhā uThā kar ghar se le ā.eñge kyā

ai mire murġhe tumhāre tazkire hoñge yahāñ

maiñ banā dūñgā tumhārī har adā ko jāvedāñ

ho mubārak tum ko murġhe gosha-e-murġh-e-jināñ

maiñ tumhārī yaad se qalb-e-hazīñ bahlā.ūñgā

ghar ke aage maiñ tumhārā maqbara banvā.uñgā

ai mere murghe mere sarmaya-e-taskin-e-jaan

teri furqat mein hai be-raunaq mera sara makan

kaun dega raat ke barah baje uTh kar azan

teri furqat mein ye dil taDpa jigar ne aah ki

kha gai tujh ko nazar shayad kisi bad-KHwah ki

tujh ko laya tha karachi se ki palunga tujhe

mashriqi aadab ke sanche mein Dhaalunga tujhe

muft-KHoron ki nigahon se bacha lunga tujhe

tujh pe lekin maut ke dil-doz sae chha gae

hasrat un ghunchon pe hai jo bin khile murjha gae

tere ghamze zindagani bhar na bhulenge mujhe

phul si kalghi mulaem par na bhulenge mujhe

tere andaz-e-hasin yaksar na bhulenge mujhe

chhoD kar mujh ko tu dast-e-dawar-e-mahshar mein hai

tera Darba tujh se behtar hai ki mere ghar mein hai

main waba-e-am se tujh ko bachata rah gaya

tujh ko kitne qimti sharbat pilata rah gaya

tujh ko rani-khet ke Tike lagata rah gaya

mere injection tujhe lutf-e-fana dene lage

jin pe takiya tha wahi patte hawa dene lage

teri surat jab bhi yaad aai jigar taDpa gai

teri furqat mein mere panw mein kal moch aa gai

KHamushi si meri duniya-e-nazar mein chha gai

kar ke bahr-e-gham mein meri kashti-e-dil pash-pash

bazi-e-goi ki daman tar makun hushiyar bash

dastan-e-murgh ek dard-e-nihan sabit hui

ye pareshani nashat-e-dushmanan sabit hui

doston ki har tasalli raegan sabit hui

dost gham-KHwari mein meri sai farmaenge kya

ek ek murgha uTha kar ghar se le aaenge kya

ai mere murghe tumhaare tazkire honge yahan

main bana dunga tumhaari har ada ko jawedan

ho mubarak tum ko murghe gosha-e-murgh-e-jinan

main tumhaari yaad se qalb-e-hazin bahlaunga

ghar ke aage main tumhaara maqbara banwaunga