musafir

mire vatan tirī ḳhidmat meñ le kar aayā huuñ

jagah jagah ke tilismāt des des ke rañg

purāne zehn kī raakh aur na.e diloñ kī umañg

na dekh aisī nigāhoñ se mere ḳhālī haath

na yuuñ ho merī tahī-dāmanī se sharminda

base hue haiñ mire dil meñ saikḌoñ tohfe

bahut se ġham ka.ī ḳhushiyāñ ka.ī anokhe log

kahīñ se kaif hī kaif aur kahīñ se dard hī dard

jinheñ uThā nahīñ saktā har ek dasht-navard

jo thailiyoñ ke shikam meñ samā nahīñ sakte

jo suitcase kī jeboñ meñ aa nahīñ sakte

bichhaḌ ke tujh se ka.ī ajnabī dayāroñ ne

mujhe gale se lagāyā mujhe tasallī dī

mujhe batā.e shab-e-tīra-o-siyāh ke raaz

mire badan ko sikhā.e hazār istilzāz

kuchh is tarah mire pahlū meñ aa.e zohra-o-shams

maiñ muddatoñ yahī samjhā kiyā ki jism kā lams

azal se tā-ba-abad ek hī masarrat hai

ki sab fareb hai merā badan haqīqat hai

aur is tarah bhī huā hai ki merī tanhā.ī

samundaroñ se lipaT kar havā se Takrā kar

kabhī sameT ke mujh ko na.e jazīroñ meñ

kabhī pahāḌ ke jharne kī tarah bikhrā kar

kabhī biThā ke mujhe āsmāñ ke dosh-ba-dosh

kabhī zamīñ kī tahoñ meñ jaḌoñ meñ phailā kar

kuchh is tarah mire ehsās meñ samā.ī hai

ki mujh ko zaat se bāhar nikāl laa.ī hai

kuchh aisā ḳhvāb sā nā-ḳhvābiyāñ sī taarī thiiñ

badan to kyā mujhe parchhā.iyāñ bhī bhārī thiiñ

mire dayār kahāñ the tire tamāshā.ī

ki dīdanī thā mirā jashn-e-ābla-pā.ī

kuchh aise dost mile shahr-e-ġhair meñ ki mujhe

ka.ī farishta-nafas dushmanoñ kī yaad aa.ī

maiñ sochtā huuñ ki kam hoñge aise dīvāne

na koī qadr ho jin kī na koī rusvā.ī

mujhe bujhā na sakī yaḳh-zada havā-e-shumāl

mujhe Dubo na sakī qulzumoñ kī gahrā.ī

na jaane kaisā kurah thā mirā vajūd ki rose

mire qarīb zamīñ ghūmtī huī aa.ī

talāsh karte hue gum-shuda ḳhazānoñ ko

bahut se misr ke fir.aun maqbaroñ meñ mile

zabān-e-sañg meñ jo ham-kalām hote haiñ

kuchh aise log purāne musass meñ mile

buland-bām kalīsā meñ the vahī fankār

jo ḳhasta-hāl masājid ke gumbadoñ meñ mile

marī thakī huī ḳhvābīdgī se nālāñ the

vo rat-jage jo masā.il kī karvaToñ meñ mile

ka.ī surāġh nazar aa.e dāstānoñ meñ

ka.ī charāġh kitāboñ ke hāshiyoñ meñ mile

sunā ke apne urūj-o-zavāl ke qisse

sabhī ne mujh se mirā rañg-e-dāstāñ pūchhā

dikhā ke barf ke mausam mire buzurgoñ ne

mizāj-e-sholgī-e-asr-e-naujavāñ pūchhā

mirī jhukī huī āñkheñ talāsh kartī raheñ

koī zamīr kā lahja koī usuul kī baat

guzar ga.ī mirī palkoñ pe jāgtī huī raat

nadāmatoñ kā pasīna jabīñ pe phuuT gayā

mirī zabāñ pe tirā naam aa ke TuuT gayā

qubūl kar ye nadāmat ki is pasīne kī

har ek buuñd meñ chiñgāriyoñ ke sāñche haiñ

qubūl kar mire chehre kī jhurriyāñ jin meñ

kahīñ junūñ kahīñ tahzīb ke tamāñche haiñ

sambhāl merā subuk hadiya-e-ġham-e-idrāk

jo mujh ko saat samundar kā zahr pī ke milā

saqāfatoñ ke har ātish-fishāñ meñ jī ke milā

talab kiyā mujhe yūnān ke ḳhudāoñ ne

janam liyā mire siine meñ devtāoñ ne

fareb-o-hirs ke har rāste se moḌ diyā

aur is ke ba.ad super market pe chhoḌ diyā

jahāñ bas ek hī me.ār-e-ādamiyat thā

hujūm-e-mard-o-zanāñ mahv-sair-e-vahshat thā

ghaḌī kā husn na.e radio kī zebā.ī

plastic ke kañval nylon kī tie

italiya ke na.e boot hong-kong ke haar

crisler kī na.ī range, tokyo ke siñgār

har ek jism ko āsūdgī kī ḳhvāhish thī

har ek aañkh meñ asbāb kī parastish thī

ye inhimāk qayādat meñ bhī nahīñ miltā

ye sū-e-nafs-e-ibādat meñ bhī nahīñ miltā

mire vatan mire sāmān meñ to kuchh bhī nahīñ

bas ek ḳhvāb hai aur ḳhvāb kī fasīleñ haiñ

qubūl kar mirī mailī qamīz kā tohfa

ki is kī ḳhaak meñ sajdoñ kī sar-zamīneñ haiñ

na dhul sakegā ye dāman ki us ke siine par

'biyāfrā' ke muqaddas lahū ke chhīñTeñ haiñ

ye vietnam kī miTTī hai jis ke zarroñ meñ

payambaroñ kī damaktī huī jabīneñ haiñ

mere watan teri KHidmat mein le kar aaya hun

jagah jagah ke tilismat des des ke rang

purane zehn ki rakh aur nae dilon ki umang

na dekh aisi nigahon se mere KHali hath

na yun ho meri tahi-damani se sharminda

base hue hain mere dil mein saikDon tohfe

bahut se gham kai KHushiyan kai anokhe log

kahin se kaif hi kaif aur kahin se dard hi dard

jinhen uTha nahin sakta har ek dasht-naward

jo thailiyon ke shikam mein sama nahin sakte

jo suitcase ki jebon mein aa nahin sakte

bichhaD ke tujh se kai ajnabi dayaron ne

mujhe gale se lagaya mujhe tasalli di

mujhe batae shab-e-tira-o-siyah ke raaz

mere badan ko sikhae hazar istilzaz

kuchh is tarah mere pahlu mein aae zohra-o-shams

main muddaton yahi samjha kiya ki jism ka lams

azal se ta-ba-abad ek hi masarrat hai

ki sab fareb hai mera badan haqiqat hai

aur is tarah bhi hua hai ki meri tanhai

samundaron se lipaT kar hawa se Takra kar

kabhi sameT ke mujh ko nae jaziron mein

kabhi pahaD ke jharne ki tarah bikhra kar

kabhi biTha ke mujhe aasman ke dosh-ba-dosh

kabhi zamin ki tahon mein jaDon mein phaila kar

kuchh is tarah mere ehsas mein samai hai

ki mujh ko zat se bahar nikal lai hai

kuchh aisa KHwab sa na-KHwabiyan si tari thin

badan to kya mujhe parchhaiyan bhi bhaari thin

mere dayar kahan the tere tamashai

ki didani tha mera jashn-e-abla-pai

kuchh aise dost mile shahr-e-ghair mein ki mujhe

kai farishta-nafas dushmanon ki yaad aai

main sochta hun ki kam honge aise diwane

na koi qadr ho jin ki na koi ruswai

mujhe bujha na saki yaKH-zada hawa-e-shumal

mujhe Dubo na saki qulzumon ki gahrai

na jaane kaisa kurah tha mera wajud ki rose

mere qarib zamin ghumti hui aai

talash karte hue gum-shuda KHazanon ko

bahut se misr ke firaun maqbaron mein mile

zaban-e-sang mein jo ham-kalam hote hain

kuchh aise log purane musass mein mile

buland-baam kalisa mein the wahi fankar

jo KHasta-haal masajid ke gumbadon mein mile

mari thaki hui KHwabidgi se nalan the

wo rat-jage jo masail ki karwaTon mein mile

kai suragh nazar aae dastanon mein

kai charagh kitabon ke hashiyon mein mile

suna ke apne uruj-o-zawal ke qisse

sabhi ne mujh se mera rang-e-dastan puchha

dikha ke barf ke mausam mere buzurgon ne

mizaj-e-sholgi-e-asr-e-naujawan puchha

meri jhuki hui aankhen talash karti rahen

koi zamir ka lahja koi usul ki baat

guzar gai meri palkon pe jagti hui raat

nadamaton ka pasina jabin pe phuT gaya

meri zaban pe tera nam aa ke TuT gaya

qubul kar ye nadamat ki is pasine ki

har ek bund mein chingariyon ke sanche hain

qubul kar mere chehre ki jhurriyan jin mein

kahin junun kahin tahzib ke tamanche hain

sambhaal mera subuk hadiya-e-gham-e-idrak

jo mujh ko sat samundar ka zahr pi ke mila

saqafaton ke har aatish-fishan mein ji ke mila

talab kiya mujhe yunan ke KHudaon ne

janam liya mere sine mein dewtaon ne

fareb-o-hirs ke har raste se moD diya

aur is ke baad super market pe chhoD diya

jahan bas ek hi mear-e-adamiyat tha

hujum-e-mard-o-zanan mahw-sair-e-wahshat tha

ghaDi ka husn nae radio ki zebai

plastic ke kanwal nylon ki tie

italiya ke nae boot hong-kong ke haar

crisler ki nai range, tokyo ke singar

har ek jism ko aasudgi ki KHwahish thi

har ek aankh mein asbab ki parastish thi

ye inhimak qayaadat mein bhi nahin milta

ye su-e-nafs-e-ibaadat mein bhi nahin milta

mere watan mere saman mein to kuchh bhi nahin

bas ek KHwab hai aur KHwab ki fasilen hain

qubul kar meri maili qamiz ka tohfa

ki is ki KHak mein sajdon ki sar-zaminen hain

na dhul sakega ye daman ki us ke sine par

'biyafra' ke muqaddas lahu ke chhinTen hain

ye wietnam ki miTTi hai jis ke zarron mein

payambaron ki damakti hui jabinen hain