musafir

vo achānak chal diyā goyā safar thā muḳhtasar

zindagī-bhar jo safar kartā rahā chaltā rahā

chhāñv meñ aflāk kī paltā rahā Dhaltā rahā

paas jo pūñjī ujāloñ kī thī sab kuchh baañT kar

raah ke be-māya zarroñ ko banā kar āftāb

ḳhud se lā-parvā zamāne kī nazar se be-niyāz

zohd se fitrī lagāo dil meñ tauqīr-e-hijāz

jaane kyuuñ us ko pasand aa.ī thī zindī kī naqāb

marhale tārīk the aur manzileñ tārīk tar

us kī nannhī raushnī paiham rahī zulmat-shikan

sarsar-e-be-e.atidālī se gurezāñ fikr-o-fan

hosh meñ thā tā-dam-e-āḳhir zamīr-e-mo'atabar

vo musāfir thā adam kī raah meñ gum ho gayā

ġham to is kā hai ki ik achchhā sā insāñ kho gayā

wo achanak chal diya goya safar tha muKHtasar

zindagi-bhar jo safar karta raha chalta raha

chhanw mein aflak ki palta raha Dhalta raha

pas jo punji ujalon ki thi sab kuchh banT kar

rah ke be-maya zarron ko bana kar aaftab

KHud se la-parwa zamane ki nazar se be-niyaz

zohd se fitri lagao dil mein tauqir-e-hijaz

jaane kyun us ko pasand aai thi zindi ki naqab

marhale tarik the aur manzilen tarik tar

us ki nannhi raushni paiham rahi zulmat-shikan

sarsar-e-be-eatidali se gurezan fikr-o-fan

hosh mein tha ta-dam-e-aKHir zamir-e-mo'atabar

wo musafir tha adam ki rah mein gum ho gaya

gham to is ka hai ki ek achchha sa insan kho gaya