musalman aur hindostan

tārīḳh ba-har daur ulaTtī hai varaq aur

maz.hab meñ hai lekin vatniyat kā sabaq aur

tū mard-e-musalmāñ hai to ik baat zarā sun

āġhosh-e-tayaqqun se haqīqat kī sadā sun

ye sach hai musalmān tabāhī se ghirā hai

ik vasvasa-e-lā-mutanāhī se ghirā hai

ālām kī had apne shikanje meñ liye hai

ik daur-e-masā.ib hai ki narġhe meñ liye hai

ārām hai mafqūd sukūñ paas nahīñ hai

ab jaise ki jiine kī koī aas nahīñ hai

āfāt nigal jaane ko muñh khol rahe haiñ

ḳhatrāt har ik samt baham bol rahe haiñ

pazhmurdagī-o-ḳhauf kā har ghar meñ hai pherā

har dil meñ hirāsānī-e-be-had kā hai Derā

be-rabt hai be-zabt hai be-rāh-numā hai

muslim hai ki be-azm hai be-hauslā-pā hai

amvāj-e-havādis meñ hai īmān-parastī

tūfān kī zad par hai musalmān kī kashtī

ye baat jahāñ meñ hai purānī bhī na.ī bhī

har qaum ko miltī hai sazā us ke kiye kī

tum aaj magar apnoñ se muñh moḌ rahe ho

ab sar pe musībat hai to ghar chhoḌ rahe ho

ye fe.al musalmān ke shāyāñ to nahīñ hai

ye diiñ nahīñ maz.hab nahīñ īmāñ to nahīñ hai

bhārat ke ba-har-hāl vafādār bano tum

nāmūs ke izzat ke nigah-dār bano tum

tariKH ba-har daur ulaTti hai waraq aur

mazhab mein hai lekin watniyat ka sabaq aur

tu mard-e-musalman hai to ek baat zara sun

aaghosh-e-tayaqqun se haqiqat ki sada sun

ye sach hai musalman tabahi se ghira hai

ek waswasa-e-la-mutanahi se ghira hai

aalam ki had apne shikanje mein liye hai

ek daur-e-masaib hai ki narghe mein liye hai

aaram hai mafqud sukun pas nahin hai

ab jaise ki jine ki koi aas nahin hai

aafat nigal jaane ko munh khol rahe hain

KHatraat har ek samt baham bol rahe hain

pazhmurdagi-o-KHauf ka har ghar mein hai phera

har dil mein hirasani-e-be-had ka hai Dera

be-rabt hai be-zabt hai be-rah-numa hai

muslim hai ki be-azm hai be-hausla-pa hai

amwaj-e-hawadis mein hai iman-parasti

tufan ki zad par hai musalman ki kashti

ye baat jahan mein hai purani bhi nai bhi

har qaum ko milti hai saza us ke kiye ki

tum aaj magar apnon se munh moD rahe ho

ab sar pe musibat hai to ghar chhoD rahe ho

ye feal musalman ke shayan to nahin hai

ye din nahin mazhab nahin iman to nahin hai

bhaarat ke ba-har-haal wafadar bano tum

namus ke izzat ke nigah-dar bano tum