musawwir

lakīreñ zindagī kī uljhaneñ bhī haiñ

lakīreñ mast dhāre kā sukūñ bhī haiñ

lakīreñ bhāgte aur shor karte din kā hangāma

lakīreñ retīle sāhil kī bhīgī raat kī nāgin kā saaya bhī

kabhī rangoñ kī āvāzoñ meñ hai

ūñchī muñDeroñ ke aqab se jhāñkne vaale sunahre chāñd kā naġhma

na.ī rut koñpaloñ aur pattiyoñ phūloñ kī ḳhushbūeñ

kabhī rangoñ kī āvāzeñ

daraḳhtoñ ke sulagte āñsuoñ kā dard maddham sā

kahīñ tāroñ kī mālā.eñ liye ākāsh kī maġhmūm sī devī

kabhī ye rang

mere zehn kī bhaTTī ke kundan se damakte surḳh angāre

kabhī rotī huī is zindagī ke dard kā mātam

kahīñ in āñsuoñ meñ qabr sī galiyoñ kā sannāTā

kahīñ kohre meñ kafnā.ī huī sham.eñ guzartī haiñ

lakiren zindagi ki uljhanen bhi hain

lakiren mast dhaare ka sukun bhi hain

lakiren bhagte aur shor karte din ka hangama

lakiren retile sahil ki bhigi raat ki nagin ka saya bhi

kabhi rangon ki aawazon mein hai

unchi munDeron ke aqab se jhankne wale sunahre chand ka naghma

nai rut konpalon aur pattiyon phulon ki KHushbuen

kabhi rangon ki aawazen

daraKHton ke sulagte aansuon ka dard maddham sa

kahin taron ki malaen liye aakash ki maghmum si dewi

kabhi ye rang

mere zehn ki bhaTTi ke kundan se damakte surKH angare

kabhi roti hui is zindagi ke dard ka matam

kahin in aansuon mein qabr si galiyon ka sannaTa

kahin kohre mein kafnai hui shamen guzarti hain