mushaheda

mire ik dost ne mujh se

kahā ai 'shāhid'-e-anvar

tirā chehra hazāroñ meñ alag pahchān rakhtā hai

tirī āñkheñ hayā kī vo nishānī haiñ

jinheñ maiñ roz taktā huuñ

tirī guftār se ma.asūm kaliyāñ muskurātī haiñ

tire alfāz meñ paiġhām hai zinda-dilī kā

tire ash.ār mujh ko hausla din-rāt dete haiñ

ye sab sunte hue hairat se

maiñ apne aap meñ ḳhāmosh baiThā thā

mirā chehra mirī āñkheñ

mirī guftār ke charche

mire alfāz aur ash.ār

koī bhī is qadar tārīf ke laa.eq kabhī na thā

magar ai dost

mohabbat ne tirī nazroñ ko vo tāsīr baḳhshī hai

ki mujh se aam insāñ ne

tire dil meñ jagah pā lī

mere ek dost ne mujh se

kaha ai 'shahid'-e-anwar

tera chehra hazaron mein alag pahchan rakhta hai

teri aankhen haya ki wo nishani hain

jinhen main roz takta hun

teri guftar se masum kaliyan muskuraati hain

tere alfaz mein paigham hai zinda-dili ka

tere ashaar mujh ko hausla din-raat dete hain

ye sab sunte hue hairat se

main apne aap mein KHamosh baiTha tha

mera chehra meri aankhen

meri guftar ke charche

mere alfaz aur ashaar

koi bhi is qadar tarif ke laeq kabhi na tha

magar ai dost

mohabbat ne teri nazron ko wo tasir baKHshi hai

ki mujh se aam insan ne

tere dil mein jagah pa li