mushahida

rū-e-mahtāb kī zau-fishānī liye

sach kī parchhā.iyāñ raqs meñ haiñ magan

soz-e-pinhāñ liye jān-e-uryāñ liye

kahkashāñ kahkashāñ raushnī ke diye

maujzan zau-fagan arsh se farsh tak

azm kā haath meñ apne parcham liye

chashm-e-bīnā agar hai to tum dekh lo

yā kisī banda-e-haq se tum pūchh lo

qalb-e-raushan agar hai to ai ham-nashīñ

shab kī tārīkiyāñ zulf ke pech-o-ḳham

tār-e-resham kī sūrat nikhar jā.eñge

jitne nāsūr haiñ dil ke bhar jā.eñge

jhuuT ḳhud aag meñ apnī jal jā.egā

sūrat-e-ḳhāk har-sū bikhar jā.egā

ru-e-mahtab ki zau-fishani liye

sach ki parchhaiyan raqs mein hain magan

soz-e-pinhan liye jaan-e-uryan liye

kahkashan kahkashan raushni ke diye

maujzan zau-fagan arsh se farsh tak

azm ka hath mein apne parcham liye

chashm-e-bina agar hai to tum dekh lo

ya kisi banda-e-haq se tum puchh lo

qalb-e-raushan agar hai to ai ham-nashin

shab ki tarikiyan zulf ke pech-o-KHam

tar-e-resham ki surat nikhar jaenge

jitne nasur hain dil ke bhar jaenge

jhuT KHud aag mein apni jal jaega

surat-e-KHak har-su bikhar jaega