mushahidat

ho ga.iiñ vīrān irfān-o-yaqīñ kī jannateñ

ḳhuld-zār-e-hind ko dozaḳh-nishāñ paatā huuñ maiñ

fitrat-e-hastī koī sahrā-e-nau ījād kar

vus.at-e-ālam ba-qadr-e-yak-fuġhāñ paatā huuñ maiñ

chal gayā fikr-o-nazar par māddiyyat kā fareb

aadmī ko maut kī jānib ravāñ paatā huuñ maiñ

rāhzan pahne hue haiñ ab libās-e-rahbarī

nuur ke saa.e meñ zulmat ko javāñ paatā huuñ maiñ

marhabā ai ātish-e-dil āfrīñ ai soz-e-ishq

har-nafas meñ ik hayāt-e-jāvidāñ paatā huuñ maiñ

bātin-e-zulmat meñ haiñ sūraj kī kirneñ be-qarār

raat ko hangāma-pairā-e-sahar paatā huuñ maiñ

faash kar detā hai ik naġhma muġhannī kā maqām

aa.ine meñ jauhar-e-ā.īna-gar paatā huuñ maiñ

rang-mahloñ meñ ġhazal-ḳhvāñ haiñ amīrān-e-kibār

ḳhaak par fāqa-kashoñ ko nauhagar paatā huuñ maiñ

koī chāñdī kā pujārī koī sone kā ġhulām

ādamiyyat ko asīr-e-sīm-o-zar paatā huuñ maiñ

talḳh thī mere liye kal tak sharāb-e-zindagī

ab sharāb-e-zindagī ko talḳh-tar paatā huuñ maiñ

ho gain viran irfan-o-yaqin ki jannaten

KHuld-zar-e-hind ko dozaKH-nishan pata hun main

fitrat-e-hasti koi sahra-e-nau ijad kar

wusat-e-alam ba-qadr-e-yak-fughan pata hun main

chal gaya fikr-o-nazar par maddiyyat ka fareb

aadmi ko maut ki jaanib rawan pata hun main

rahzan pahne hue hain ab libas-e-rahbari

nur ke sae mein zulmat ko jawan pata hun main

marhaba ai aatish-e-dil aafrin ai soz-e-ishq

har-nafas mein ek hayat-e-jawidan pata hun main

baatin-e-zulmat mein hain suraj ki kirnen be-qarar

raat ko hangama-paira-e-sahar pata hun main

fash kar deta hai ek naghma mughanni ka maqam

aaine mein jauhar-e-aina-gar pata hun main

rang-mahlon mein ghazal-KHwan hain amiran-e-kibar

KHak par faqa-kashon ko nauhagar pata hun main

koi chandi ka pujari koi sone ka ghulam

aadamiyyat ko asir-e-sim-o-zar pata hun main

talKH thi mere liye kal tak sharab-e-zindagi

ab sharab-e-zindagi ko talKH-tar pata hun main